Greqia ka njoftuar sot më 14 maj, hapjen e kufirit me Maqedoninë e Veriut, si dhe vazhdimin e masave me Shqipërinë.
Kalvari i masave vijon që prej nëntorit të vitit 2020, kur pala greke e ka rikthyer disa herë.
Deri më 24 maj, dogana e Kapshticës do të funksionojë me të njëjtat rregulla. Nga ora 06:00 deri në 22:00, mund hysh drejt Shqipërisë.
Brenda 24 orëve në Kakavijë drejt Greqisë lejohet kalimi i vetëm 400 personave, rezidentë ose me leje, sigurisht me testin anti-Covid-19.
Fillimisht masat nga pala greke u ndërmorën, për shkak të ndalimit të përhapjes së Covid-19, pas shtimit të rasteve çdo ditë e më shumë te të dyja vendet fqinje.
Ky vendim ngjall pikëpyetje, pasi më 19 prill, Greqia hapi sezonin turistik për 30 vende të ndryshme dhe jo për Shqipërinë.
Hapja e kufijve u bë për vendet anëtare të Bashkimit Evropian, Shtetet e Bashkuara të Amerikës, Mbretëria e Bashkuar, Emiratet e Bashkuara Arabe, Izraeli dhe shtetet fqinje Serbi dhe Maqedoni e Veriut.
Duke parë kurbën e rasteve të infektimeve me Covid-19, Shqipëria është e para për rastet më të ulëta, me një mesatare katër herë më e ulët se ajo e Maqedonisë së Veriut.
Albanian Post (AP) kontaktoi me Ambasadën e Greqisë, këtu në Tiranë, për ta pyetur mbi arsyet e këtij vendimi. Sipas saj, vendimi është 10-ditor dhe do të rishqyrtohet.
“Hapja e kufijve me vende të caktuara do të vendoset në faza të ndryshme dhe varet gjithashtu nga politika përkatëse e vendosur në nivelin e BE-së”, shkruhet në përgjigjen e Ambasadës greke për AP-në.
Ndërkohë, Ministria për Evropën dhe Punët e Jashtme (MEPJ), në reagimin për AP-në mbi çështjen, theksoi se “Greqia është një shtet sovran dhe ka të drejtën e plotë të vendimmarrjes”.
Gjithashtu, MEPJ-ja sqaroi se vende të ndryshme ndjekin këtë politikë për arsye tregtare dhe jo vetëm.
Situata e vaksinimit në të dyja vendet
Shqipëria renditet e dyta, pas Serbisë në Ballkanin Perëndimor, ndërsa ritme shumë të ulëta në këtë drejtim kanë pasur Maqedonia e Veriut dhe Kosova.
Ajo e ka filluar vaksinimin më 11 janar, në të njëjtën ditë kur në Aeroportin Ndërkombëtar Rinas mbërritën 975 vaksina anti-Covid.
Nga ana tjetër, Maqedonia e Veriut mbetet shumë mbrapa me vaksinimin e popullatës. Deri më tani raportohet të jenë administruar 74 mijë e 76 doza të vaksinave Covid.
Sezoni turistik në Greqi
Autoritetet greke më herët kanë njoftuar se do të heqin kufizimet në udhëtimet mes rajoneve. Gjithashtu edhe se do të shfuqizojnë metodën e aplikimit online për të dalë nga shtëpia.
Këtë konfirmoi zëvendësministri grek, Akis Skertsos, të mërkurën e 12 majit, gjatë një konference për pandeminë.
Sipas tij, të gjithë ata që duan të udhëtojnë drejt Greqisë, duhet të sigurojnë një certifikatë vaksinimi, testin PCR- negativ, testimin e shpejtë, ose vetëtestimin. Kjo është e nevojshme 72 ose 24 orë para udhëtimit
Gjithashtu, Skertsos shpjegoi se përgjegjëse për të kontrolluar pasagjerët do të jenë kompanitë ajrore dhe tragetet, nëse janë të pajisur me dokumentacionin e lartpërmendur.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Greqia nuk do të dërgojë sisteme të mbrojtjes ajrore në Ukrainë pavarësisht presionit të BE-së
-
Bardhi i përgjigjet Ramës: Do ta kuptojë shumë shpejt nëse kam bërë apo jo kallëzim në SPAK
-
Basha: Ja vija blu që të bashkohemi rreth një alternative
-
Rama: Kallëzimi i pabërë i Bardhit iu shit si sapun për djathë italianëve