Gjyqësori i Italisë në luftë për pushtet me qeverinë e ekstremit të djathtë

Në Itali, qeveria e ekstremit të djathtë është përfshirë në një luftë për pushtet me magjistratët mes hetimeve të diskutueshme që përfshijnë figura kryesore brenda koalicionit qeverisës.

Një dokument që citon burime nga zyra e kryeministres Giorgia Meloni, thuhet se një segment i gjyqësorit u sulmua “për zgjedhjen e të luajturit një rol aktiv opozitar” në përpjekjen e supozuar për të rrëzuar administratën e saj përpara zgjedhjeve parlamentare evropiane të vitit të ardhshëm.

Sakaq, tensionet kanë vluar mes dy pushteteve që kur u shfaqën akuza në lidhje me aktivitetet e biznesit të ministres së Turizmit, Daniela Santanchè, një ndihmëse e ngushtë e Meloni-t, duke çuar në thirrje për dorëheqjen e saj.

Santanchè mohoi se ajo ishte duke u hetuar gjatë një fjalimi në parlament javën e kaluar. Megjithatë, burimet gjyqësore konfirmuan menjëherë pas fjalimit se ajo ishte nën hetim që nga tetori për falimentim dhe pretendime të rreme të kontabilitetit që përfshinin grupin e saj botues, Visibilia.

“Kurrë nuk kam përvetësuar diçka që nuk më takon, nuk kam abuzuar asnjëherë me postet e mia të larta në kompani. Unë sfidoj këdo për të provuar të kundërtën”, ka thënë ajo.

Po ashtu një gjykatës është sulmuar nga qeveria pasi refuzoi një kërkesë nga prokurori publik për të anuluar një çështje që përfshin Andrea Delmastro, një zyrtar nga partia e Meloni-t me rrënjë neofashiste.

Delmastro u akuzua për shkelje të rregullave të fshehtësisë pasi foli në parlament në lidhje me Alfredo Cospito, një anarkist i burgosur nën një regjim të ashpër që zakonisht rezervohet për bosët e mafias.

Ndërkohë, Ignazio La Russa, presidenti i dhomës së lartë dhe një bashkëthemelues i partisë, nxiti polemika pasi hodhi dyshime mbi akuzat për përdhunim të bëra nga një grua kundër djalit të tij.

Maurizio Gasparri, një politikan me Forza Italia-n të të ndjerit Silvio Berlusconi, akuzoi gjyqësorin për “sulm ndaj kushtetutës”.

Por magjistratët janë kundërpërgjigjur, duke argumentuar se akuzat “e rreme” ndaj tyre minojnë besimin te gjyqësori.

Ndërkaq, qeveria e Meloni-t po përpiqet të shtyjë ndryshimet gjyqësore, duke përfshirë kufizimin e përdorimit të përgjimit dhe shfuqizimin e krimit të shpërdorimit të detyrës, të cilat të dyja janë kritikuar nga gjyqtarët.

Gjithashtu qeveria po kërkon të ndajë rrugët e karrierës së gjyqtarëve dhe prokurorëve, në mënyrë që ata të mos mund të kalojnë më nga një punë në tjetrën.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.