Gjenerata Z – e shqetësuar – po riformëson ëndrrën kineze

“Kam pasur një, dy, tre, katër…pesë punë në muajt e fundit”, ka treguar Joy Zhang, një 23-vjeçare e diplomuar.

Ajo i numëron punët teksa ecën nëpër një varg tezgash në një treg lokal ushqimor në Chengdu, një qytet në provincën Sichuan të Kinës jugperëndimore.

“Fakti është se ka shumë vende pune, problemi është nëse jeni të gatshëm të ulni pritshmëritë tuaja”, ka shtuar ajo.

Përvoja e Joy nuk është e pazakontë në Kinën e sotme, ku ka më shumë të diplomuar sesa punëdhënës që kanë nevojë për ta.

Nga klasa e saj prej 32 vetash, vetëm rreth një e treta kanë gjetur punë me kohë të plotë që nga diplomimi në verë.

Më shumë se një në pesë persona midis moshës 16 dhe 24 vjeç janë të papunë në Kinë, sipas të dhënave zyrtare nga gushti 2023.

Me vitet e lulëzimit të Kinës pas tyre, miliona të rinj po përballen me një të ardhme për të cilën nuk ishin përgatitur.

Ndërkohë menyra se si ata reagojnë do të formësojë fatin e ekonomisë së dytë më të madhe në botë.

Një revolucion po ndodh në mendjet e Gjeneratës Z të vendit, sipas antropologut Xiang Biao, një profesor i Universitetit të Oxfordit, i cili kalon shumë kohë duke folur me të rinjtë në Kinë.

“E gjithë jeta e të rinjve është formuar nga ideja se nëse studion shumë, atëherë në fund të punës tënde të palodhur do të presësh një punë dhe një jetë të mirë, me pagesë të lartë. Dhe tani ata zbulojnë se premtimi nuk funksionon më”.

Mundësitë janë tkurrur në një ekonomi të ngadalësuar, me shumë borxhe, e cila u godit rëndë nga bllokimet e papritura të periudhës së pandemisë.

Nën kontrollin e palëkundur të Pekinit, Kina është tani një vend i pasigurt për të bërë biznes si për sipërmarrësit e uritur ashtu edhe për investitorët e huaj.

​ Ëndrra të vjetra dhe të reja

Tabloja e sipërpërmendur ishte e dukshme në një panair të punës së fundit në Pekin.

Rekrutuesit që flisnin mirë më së shumti ofronin punë me aftësi të ulëta, të tilla si asistentë për të shitur pajisje mjekësore.

“Mendoj se vështirësitë janë thjesht të përkohshme. Njerëzit me aftësi reale do të gjejnë punë”, ka këmbëngulur një 25-vjeçar.

“E ardhmja e botës është në Kinë”, ka shtuar ai.

I sapodiplomuari Tianyu, i cili ka studiuar inxhinieri softuerike, duket më pak i sigurt për këtë.

Ai ka treguar se megjithëse aftësitë e tij ishin shumë të kërkuara shumë, kishte shumë të diplomuar me një rezyme të ngjashme. “Kështu që nuk është e lehtë të gjesh një punë”.

Disa nga miqtë e tij po synojnë një karrierë në qeveri duke pasur parasysh perspektivat e zymta në sektorin privat.

Por Tianyu thekson se “teksa shumë janë duke kërkuar punë, jo shumë kanë gjetur”. Dhe ata që patën fat po punojnë në fusha që nuk kanë lidhje me formimin e tyre akademik.

Kështu ka vepruar edhe Joy, ajo nisi punët që mund të gjente.

“Këto punë nuk kanë perspektiva të mira për të ardhmen tuaj”, ka treguar Joy.

“Ofrojnë paga të ulëta dhe ju jeni lehtësisht të zëvendësueshëm. Kjo është arsyeja pse shumica e njerëzve preferojnë të qëndrojnë në shtëpi”.

Ajo tani ka pranuar një pozicion për shitjen e materialeve edukative. Nuk është puna e saj e ëndrrave, por ajo e sheh atë si një mënyrë për të fituar përvojë.

Tregu i punës mund të jetë i vështirë, por Joy beson se jeta për të është akoma më e lehtë se sa për prindërit e saj, kur Kina ishte shumë më e varfër dhe ëndrrat ishin shumë më të largëta.

“Unë mendoj se ky brez është me fat dhe i bekuar”, ka theksuar ajo.

“Ka shumë kohë dhe shumë shanse që ne të arrijmë qëllimet tona. Ne mund të mendojmë më thellë për atë që duam vërtet. Krahasuar me gjeneratën e kaluar, nuk na intereson aq shumë për të fituar para. Ne mendojmë më shumë se çfarë ne mund të bëjmë për të arritur ëndrrat tona”.

Kjo është ajo që Xiang e quan një “rishkrim i ëndrrës kineze”. Pandemia ka qenë një nga katalizatorët e ëndrrës së re kineze të Gjeneratës Z.

“Të rinjtë ndjenin një ndjenjë cenueshmërie…që jeta e tyre mund të ndryshohej, të rrëzohej nga forca të fuqishme. Kjo i bën ata të rimendojnë të gjithë paradigmën se si është organizuar shoqëria kineze dhe si organizohet jeta kolektive kineze”, ka shpjeguar profesori.

Edhe gjatë bllokimeve të rrepta pandemike të Kinës, të rinjtë u inkurajuan të shkonin në kolegj. Dhe ata kanë shkuar në një numër të madh – me një rekord prej 11.6 milionë studentësh të diplomuar vetëm në vitin 2023.

Frustrimi i tyre ka frymëzuar meme virale, humor cinik dhe madje edhe zgjedhje jokonvencionale.

Disa postuan foto alternative të diplomimit të tyre duke hedhur disertacionet e tyre në kosh.

Shumë prej tyre kanë pushuar së kërkuari punë krejtësisht, në vend që të shkojnë në shtëpi për të qenë një fëmijë me kohë të plotë.

Disa e dokumentojnë jetën e tyre në mediat sociale pasi fitojnë shuma të vogla parash duke bërë punët e shtëpisë për prindërit e tyre ose duke u kujdesur për të vegjlit në familje.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.