Gianluigi Buffon njoftoi disa ditë më parë se ky do të jetë sezoni i fundit me Juventus-in. Ndërsa, gardiani i portës është në mëdyshje për vazhdimin e karrierës apo tërheqjen nga futbolli, disa klube kanë shfaqur interes për të marrë shërbimet e tij.
43-vjeçari është në aventurën e tij të dytë te Juventus-i, pasi në 2018 u largua në drejtim të PSG-së, ku pas një viti u rikthye përsëri.
Javët e fundit ka pasur shumë zëra në lidhje me destinacionin e ri të Buffon-it. Në skenë kanë dalë disa ekipe me emër si Milan-i, Roma dhe Boca Juniors-i.
La Gazetta dello Sport raporton se së fundmi Monza e Silvio Berlusconi-t dhe e drejtuar nga Adriano Galliani ka shfaqur interes për portierin. Ata po krijojnë një projekt ambicioz dhe këtë sezon arritën deri në play-off për ngjitjen në Serinë A, por u mposhtën nga Cittadela.
Tuttosport gjithashtu raporton edhe disa ekipe të tjera që interesohen për shërbimet e Buffon-it: Parma, Gallatasaray, Olympiacos dhe Porto.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
