Biden: Putin është racional, por i bëri llogaritë gabim

Presidenti rus, Vladimir Putin, është një personazh racional, por megjithatë ai nuk e diti t’i vlerësojë saktë aftësitë e tij për të pushtuar Ukrainën dhe shtypur popullin e saj.

Të paktën kështu mendon presidenti amerikan, Joe Biden, i cili gjatë një intervistë për rrjetin amerikan “CNN” tha Putini i ka bërë llogaritë gabim.

Duke qenë se konflikti në Ukrainë po i afrohet muajit të tetë, intervista me Biden dha një pasqyrë të re në të menduarit e tij, ndërsa zyrtarët e lartë amerikanë shikojnë me shqetësim përshkallëzimin e luftimeve.

Biden u shpreh në intervistë se kërcënimet që vijnë nga Rusia mund të rezultojnë në “gabime” dhe “llogaritje të gabuara” katastrofike.

Por, ai nuk pranoi të shprehej se si saktësisht do të përgjigjeshin Shtetet e Bashkuara të Amerikës nëse Putini vendos një pajisje taktike bërthamore në fushën e betejës në Ukrainë.

Administrata Biden dhe liderët e tjerë perëndimorë kanë kaluar disa nga muajt e fundit duke debatuar se çfarë hapash mund të ndërmarrë Putini, ndërsa trupat e tij pësojnë humbje të turpshme në fushën e betejës në Ukrainë.

Kështu, presidenti amerikan i qëndroi fjalisë së tij se vetë Putini ishte racional, por qëllimet e liderit rus në Ukrainë janë qesharake.

“Ju dëgjoni atë që ai thotë. Nëse e dëgjoni fjalimin që ai dha kur u mor vendimi, Putin foli për këtë ide: ai duhej të ishte lideri i Rusisë që bashkonte të gjithë rusishtfolësit. Dua të them, thjesht mendoj se është irracionale”, tha Biden.

Duke shkuar më tej, presidenti theksoi se Putini gabimisht besonte se ukrainasit do t’i nënshtroheshin pushtimit rus – një gjykim i gabuar që është hedhur poshtë nga rezistenca e ashpër brenda vendit.

“Fjalimi, objektivat e tij nuk ishin racionalë. Ai mendoi se do ta mirëprisnin krahëhapur, se kjo ishte shtëpia e Nënës Rusi në Kiev dhe se ku do të pritej, dhe mendoj se ai thjesht e llogariti gabimisht”, tha Biden.

Në të vërtetë, një kundërofensivë e nisur nga Ukraina muajin e kaluar ishte e suksesshme në rimarrjen e territorit të mbajtur më parë nga rusët, duke përfshirë qendrat kritike të transportit.

Humbjet dëshmuan sikletin e fundit të madh për Rusinë, ushtria e së cilës ka luftuar gjatë rrjedhës së luftës shtatë-mujore.

Megjithatë, këtë javë, Rusia nisi një nga fushatat e saj më të ashpra të bombardimeve që nga pushtimi në fund të shkurtit.

Të paktën 19 njerëz janë vrarë dhe më shumë se 100 janë plagosur në të gjithë vendin, deri në qytetin perëndimor të Lviv, qindra milje nga teatrot kryesore të luftës në Ukrainën lindore dhe jugore.

I pyetur nëse ai do të takohej me Putinin në samitin e Grupit 20 të muajit të ardhshëm në Indonezi, Biden tha se nuk shihte një arsye të mirë për tu ulur më të.

“Do të varej konkretisht nga ajo për të cilën ai donte të fliste”, shpjegoi presidenti duke shtuar se nëse Putin donte të diskutonte për yllin e burgosur të basketbollit amerikan, Brittney Griner, atëherë ai do të ishte i hapur për të biseduar.

Pasi Biden paralajmëroi javën e kaluar se rreziku i “Armagedonit” bërthamor ishte në pikën e tij më të lartë që nga kriza e raketave Kubane, ai i tha intervistuesit se nuk besonte se Putini do ta merrte përfundimisht atë hap.

“Unë mendoj se është e papërgjegjshme që ai të flasë për këtë, idenë që një udhëheqës botëror i një prej fuqive bërthamore më të mëdha në botë thotë se ai mund të përdorë një armë bërthamore taktike në Ukrainë”.

Për të,  kërcënimet e Putinit kanë një efekt destabilizues dhe paralajmëroi për gabimet e mundshme.

Biden refuzoi të zbulonte se si do të dukej një përgjigje e SHBA-ve nëse Putin do të zbatonte kërcënimet e tij bërthamore.

Por ai theksoi se Departamenti i Mbrojtjes kishte zhvilluar në mënyrë proaktive raste të paparashikuara nëse skenari ndodhte.

Po ashtu, Biden tha se besonte se ishte koha për të “rimenduar” marrëdhëniet e SHBA-ve me Arabinë Saudite pasi mbretëria u bashkua me Rusinë për të ulur prodhimin e naftës.

Kjo edhe pas një përpjekjeve intensive të Shtëpisë së Bardhë për të parandaluar një vendim të tillë.

“Unë jam në proces, kur Dhoma dhe Senati të kthehen, ata do të duhet – do të ketë disa pasoja për atë që ata kanë bërë me Rusinë”, tha Biden.

Vendimi i kartelit të naftës OPEC+ të udhëhequr nga Arabia Saudite për të ulur prodhimin javën e kaluar nxiti zemërimin në Shtëpinë e Bardhë, ku zyrtarët thanë se Biden ishte personalisht i zhgënjyer nga ai që ata e quajtën një vendim “dritëshkurtër”.

Lëvizja, e cila erdhi tre muaj pasi Biden vizitoi Arabinë Saudite dhe u takua me liderin e saj de fakto, Princin e Kurorës, Mohammed bin Salman, ka potencial për të rritur çmimet e gazit në javët përpara zgjedhjeve afatmesme të nëntorit.

Për Biden, vendimi ishte një fyerje e veçantë për shkak të përpjekjeve të tij gjatë verës për të riparuar lidhjet me Arabinë Saudite, pavarësisht nga historia e mjerueshme e mbretërisë për të drejtat e njeriut dhe roli i bin Salmanit në vrasjen e gazetarit disident Jamal Khashoggi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.