Biden kërkon që 40% e shitjeve të automjeteve të reja të jenë elektrike

Shtëpia e Bardhë u ka thënë prodhuesve amerikanë të automjeteve se dëshiron që ata të mbështesin një premtim vullnetar që të paktën 40 për qind e shitjeve të automjeteve të reja të jenë elektrike.

Kjo deri në vitin 2030, pasi po punon për të zvogëluar ndotjen e gazit serrë.

Agjencia e lajmeve, “Reuters”, tregon se administrata është e vendosur që në javën e ardhshme të hapë rishikimet e propozuara për standardet e emetimeve të automjeteve deri në vitin 2026.

Madje, burimet kanë thënë se një objektiv i vullnetshëm i automjetit elektrik mund të jetë deri në 50 për qind, por asnjë marrëveshje me prodhuesit e automjeteve nuk është arritur dhe shumë detaje mbeten në diskutim, përfshirë nëse ai premtim do të përmbajë lloje të ndryshme të hibrideve elektrikë me benzinë.

Brian Rothenberg, zëdhënësi i United Auto Workers (UAW), ka thënë se një raport i publikuar ishte i pasaktë “se ne kemi rënë dakord për 40 për qind të makinave elektrike deri në vitin 2030. UAW është ende në diskutime dhe nuk ka arritur marrëveshje në këtë pikë”.

Ndërkohë, UAW ka kundërshtuar mandatet e makinave elektrike, duke paralajmëruar se mund të rrezikojë disa vende pune.

Këtë muaj, kompania mëmë e Fiat Chrysler, Stellantis, ka deklaruar se po synonte që mbi 40 për qind e automjeteve në Shtetet e Bashkuara të Amerikës të ishin me emetim të ulët deri në vitin 2030. Mirëpo, Stellantis nuk ka pranuar të komentonte të enjten.

Të njëjtën gjë ka bërë edhe General Motors Co. Kompania ka thënë se aspiron të përfundojë shitjet e automjeteve të reja të lehta me benzinë ​​në SHBA deri në vitin 2035.

Nga ana tjetër, edhe Shtëpia e Bardhë nuk ka pranuar të komentojë diskutimet.

Kurse Ford Motor Co vuri në dukje se planifikon “të paktën 40 për qind të vëllimit të automjetit tonë global të jetë elektrik deri në 2030-n”.

“Reuters” tregon se administrata e presidentit amerikan, Joe Biden, i ka rezistuar thirrjeve nga shumë demokratë për të vendosur një objektiv të detyrueshëm për miratimin e makinave elektrike ose për të ndjekur Kaliforninë në caktimin e 2035-s si një afat për të hequr përfundimisht shitjen e automjeteve të lehta me benzinë.

Dhe se Administrata Kombëtare e Sigurisë në Trafikun e Autostradave (NHTSA) së bashku me Agjencinë për Mbrojtjen e Mjedisit (EPA) po shqyrtojnë rikthimin e standardeve të ekonomisë së karburantit në mars të vitit 2020 të ish presidentit, Donald Trump.

Asokohe, Trump-i kërkoi 1.5 për qind rritje vjetore të efikasitetit deri në vitin 2026, shumë më poshtë se rritjet vjetore prej pesë për qind të vendosura në vitin 2012 nga administrata e presidentit, Barack Obama.

Lidhur me rregullat e propozuara të Biden-it, të cilat do të mbulonin vitet 2023-2026, pritet të jenë të ngjashme në uljet e përgjithshme të shkarkimeve të automjeteve në marrëveshjen e Kalifornisë të 2019-s me disa prodhues automjetesh çka synon të përmirësojë ekonominë e karburantit me 3.7 për qind në vit.

Të paktën kështu kanë bërë me dije burimet me njohje mbi çështjen për “Reuters”. Gjithashtu kërkesat e vitit 2026 pritet të tejkalojnë përmirësimet vjetore të epokës së Obama-s me pesë për qind.

Në muajin mars, një grup prej 71 demokratësh në Shtëpinë e Përfaqësuesve të SHBA-së e nxitën Biden-in të vendoste rregulla të ashpra emetimesh për të siguruar që 60 për qind e makinave të reja të pasagjerëve dhe kamionëve të shitur të jenë me shkarkime zero deri në vitin 2030.

Ndërsa në prill, një duzinë guvernatorësh nga shtete të ndryshme, duke përfshirë Kaliforninë, New York-un dhe Massachusetts, i kërkuan presidentit të miratojë ndalimin e shitjeve të automjeteve të reja me benzinë ​​të pasagjerëve deri në 2035-n.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.