“Lulzim Basha është vënë nën presionin e sanksioneve. Më mirë të dorëhiqej se sa të dorëzonte sovranitetin e Partisë Demokratike”.
Kjo është replika e menjëhershme e ish-kreut dhe liderit historik të demokratëve, Sali Berisha, i cili e ka quajtur nul këtë vendim të Lulzim Bashës për ta përjashtuar atë nga Grupi Parlamentar i demokratëve.
Sipas Berishës, një vendim të tillë nuk e merr një person që respekton parimet parlamentare të një force të lirë politike.
“Unë e kuptoj presionin që ka pasur Basha, por duhet të konsideronte dorëheqjen e tij sa të konsideronte dorëzimin e sovranitetit”, u shpreh ai.
Ish-kryeministri e tha qartë se ai nuk do ta pranojë kurrë këtë vendim. Vendim, i cili për të e asgjëson forcën politike parlamentare.
Ai theksoi se do të bashkëpunoj me çdo demokrat për të rikthyer sovranitetin e Partisë Demokratike.
Për një vendim të tillë, ai shpjegoi se Basha duhet të mblidhte fillimisht Kongresin e PD-së. Më pas, ai duhet të vendoste një nen të posaçëm, që përjashton nga partia ata të cilët shpallen non grata.
“Shqipëria në këtë rast ka humbur, dhe e tërë shoqëria shqiptare ka humbur. Kam komunikuar dhe e dija që ai ishte në presione, por nuk e dija që do shpallte këtë vendim pas asnjë lloj rregulli dhe personal”.
Ndër të tjera bëri me dije se ka ndjekur rrugën gjyqësore, dhe nuk dëshiron ndihmën e Bashës.
“Ndihma më e madhe ka qenë ajo që kërkonte transparencë. Më kanë kërcënuar me çdo gjë, unë po ky jam do qëndroj në mbrojtje të dinjitetit tim dhe PD-së”.
Sipas Berishës, PD-ja është shndërruar në një parti pa sovranitet e cila dorëzohet e tëra nga “lobimi i Edi Ramës dhe Sorosit”.
“Do bëj gjithçka për rivendosjen e sovranitetit të Partisë Demokratike, kthim në parime që sot i shkelmoi Lulzim Basha pa të cilat forca politike është një fasadë opozitë”.
Ish-presidenti, tha ndër të tjera se ish-ambasadori i SHBA-ve në Shqipëri, Donald Lu i ka sjellë dosje për Bashën për lidhjen me rusët që nuk kishte asnjë fakt.
“Ky vendim i Bashës, e shndërron PD-në në një satelit të Edi Ramës. Basha ka bërë një gabim fatal”.
“Sot me mua janë shumica dërmuese e demokratëve, dhe jo vetëm”, thotë ai , duke bërë me dije se, “nuk mund të konceptoj që një vend tjetër, qeveri tjetër, me baza lobimi të marrë një vendim ndaj një njeriu që ka 8 vite në opozitë në mbrojtje të interesit publik”.
Basha përjashtoi Berishën nga Grupi Parlamentar i PD-së
Reagimi i Berishës vjen disa minuta pas daljes së Kryetarit të Partisë Demokratike, Lulzim Basha, me vendimin për të lënë jashtë grupit parlamentar të PD-së, themeluesin e kësaj partie dhe ish-kryeministrin e Shqipërisë.
Në një deklaratë për mediat, ai u shpreh se “shpallja persona non-grata e Sali Berishës, ishte një nga momentet më të vështira për mua si kryetar, si demokrat, si bashkëpunëtor i Berishës”.
Sipas Bashës, ky moment ka qenë i vështirë, kjo “jo vetëm për faktin se çfarë përfaqëson Sali Berisha, por edhe unë jam dëshmitar, si bashkëpunëtor i tij, sa rëndësi ka pasur për atë mbrojtja e interesit publik”.
Kryedemokrati theksoi gjithashtu se i është bashkuar thirrjes së ish-kryeministrit Berisha, që “ditën e parë të vendimit nga Departamenti Amerikan i Shtetit (DASH) për transparencë të plotë”.
Gjatë fjalës së tij, kreu i demokratëve, e ka cilësuar Berishën si “udhëheqësi shqiptar që ka dhënë kontributin më të çmuar për demokracinë”.
Marrëdhënia Shqipëri-SHBA ka arritur nivele të larta gjatë kohës së Berishës. “Shqipëria përmbushi reformat e nevojshme për anëtarësimin në NATO, si dhe marrjen e statusit të vendit kandidat për në Bashkimin Evropian, me partner kyç SHBA-të”.
Basha ka përsëritur gjithashtu se “vendimi i DASH-it nuk cenon arritjet e Shqipërisë në drejtimin e Berishës, kontributin në demokratizimin e Shqipërisë dhe marrëdhënien e PD-së me SHBA-të. PD mbështet kërkesën për transparencë”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Rrëfimi rrëqethës i Ermal Metës për sulmet e panikut: Për një kohë të gjatë u vetësabotova, përfundova në telashe me sjellje të paqarta, terapia ishte themelore
-
Çfarë parashikon projektligji me kushtet e reja për abortin dhe lindjet invitro?
-
Afganët e ‘harruar’ në Shqipëri në pritje të vizave amerikane
-
Parashikimi i motit, 29 prill 2024