As Lazio dhe as Juventus, Felipe Anderson largohet nga Evropa

Felipe Anderson ka njoftuar përmes mediave sociale se nuk do të nënshkruajë kontratë të re me Lazio-n, pasi zyrtarisht nënshkroi për Palmeiras-in, pavarësisht lidhjeve me Juventus-in.

Marrëveshja aktuale e brazilianit do të skadojë më 30 qershor dhe negociatat janë zvarritur me muaj pa sukses.

U raportua se trajneri i ri Igor Tudor po e shtynte klubin të arrinte një marrëveshje, por tani sulmuesi konfirmoi largimin e tij me një postim në Instagram.

“Në respekt për Lazio-n dhe tifozët e saj që më kanë mbështetur gjithmonë, konfirmoj se nuk kam arritur një marrëveshje për të rinovuar kontratën time me klubin dhe për këtë arsye do të ndjek një rrugë të re sezonin e ardhshëm”, shkruan Anderson.

“Gjithmonë e kam dëshmuar profesionalizmin dhe përkushtimin tim ndaj Lazio-s, ndaj mund t’ju siguroj se do të vazhdoj të përkushtohem për të nderuar këtë fanellë deri në ditën e fundit të kontratës sime”.

“Faleminderit për gjithçka!”, përfundon braziliani.

Felipe Anderson është në periudhën e tij të dytë te Lazio, pasi ka qenë tashmë në klub nga 2013 deri në 2018.

Ai u kthye nga West Ham United në verën e vitit 2021 dhe tani ka 319 paraqitje për Lazio-n, duke shënuar 58 gola dhe duke dhënë 63 asistime.

Ka pasur raporte të shumta se Juventus-i është gati të mirëpresë Felipe Anderson-in si lojtar i lirë, por kjo tashmë hidhet poshtë.

Pasi “Sportitalia” raportoi se Juventus-i po frenonte nënshkrimin e tij, Palmeiras njoftoi se në vend të kësaj ata kanë siguruar Felipe Anderson deri më 31 dhjetor 2027.

Besohet se ai donte të kthehej në Brazil për arsye familjare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.