Piktori britanik Arthur Lanyon u rrit në një familje artistësh.
I ati i tij ishte piktori Matthew Lanyon, kurse gjyshi i tij ishte artisti i njohur modernist Peter Lanyon.
“Kishte art kudo, kështu që erdhi natyrshëm, nuk e mendoja vërtet”, thotë ai.
37-vjeçari i ka kaluar dy vitet e para në Leicester përpara se të zhvendosej në Cornwall, ku ende jeton në një shtëpi të ndërtuar nga prindërit e tij pranë Penzance.
Pikturat e tij shpesh kombinojnë motive figurative me një abstraksion emocional.
Ndërmend i vjen një kujtim nga studimet e kryera në Universitetin e Cardiff-it, ku u diplomua për artet e bukura në vitin 2008.
“Profesori më pyeti se çfarë do të pikturoja. Dhe unë i thashë se dua të pikturoj gjithçka”, kujton ai.
“Unë përdor abstraksionin për të gërmuar shumë gjëra dhe po interesohem gjithnjë e më shumë t’i zgjedh ato gjëra me vizatim”, tregon piktori.
Ndër frymëzuesit e tij, Lanyon përmend ekspresionizmin abstrakt të viteve ‘50 dhe ‘60, krahas artistëve të tillë si Robert Rauschenberg.
“Ai ekzistonte në një kohë të ngjashme, por bënte diçka shumë të ndryshme me imazhet. Ju mund të shihni se çfarë ishte dhe kishte arsye të ndryshme pas… ishte shumë interesante”, tregon ai.
Ekspozita më e fundit vetjake e Lanyon, “Coda for an Obol”, do të jetë në galerinë Anima Mundi të St Ives këtë muaj, duke paraqitur një ekzaminim ekzistencial të trashëgimisë.
Në të përfshihen tema nga mitologjia klasike.
Ekspozita përfshin më shumë se 30 vepra arti të tri viteve të fundit të punës së tij.
Për të, artisti ofron një pasqyrë të ngjarjeve kryesore të jetës duke përshkuar kuptimin dhe motivet e tij.
Pz
“Pz është shkurtim për Penzance, qytetin tim të lindjes. Ka një figurë dhe ka një fytyrë, por ka këto boshllëqe ovale të pagabueshme. Ato nuk janë vakum, janë thjesht si një hapësirë përmes së cilës mund të ndjeni të kundërtën”, tregon ai.
Sakaq, pjesa tjetër e hapësirës është plot me materie. “Në këtë kuptim, ka humbur shpirtin ashtu si qyteti ka humbur shpirtin e tij”.
House Almeria
“Përdor shumë nga vizatimet e mia të fëmijërisë dhe një prej tyre ishte Indalo – fantazma që mund të mbante një ylber në duar”, zbulon piktori.
Është një simbol i Almeria-s në Spanjë.
“Duhet ta kem kopjuar diku si fëmijë duke mos ditur rëndësinë. Në mënyrë të turpshme, e rikopjova në këtë pikturë, 30 vjet më vonë, ende pa e ditur rëndësinë e saj”, shton ai.
Lycabettus
“Kjo nuk ishte e lehtë për t’u bërë. Filloi pa pagesë dhe unë inkurajova këdo që vinte të bënte shenjën e vet. Nga ajo lloj harmonie, ajo pikënisje bashkëpunuese, u ndërtua në shtresa dhe gjërat u rrënjosën”, tregon ai.
Kështu, piktura mori trajtën e plotë.
Curricle
“Nëse do të mund të tërhiqja vëmendjen në qendër të majtë, ka dy figurina të vogla… këto janë si motive të përsëritura. I kam marrë në tre piktura të tjera në shfaqje”, thotë Lanyon.
Figura në të majtë është nga një libër i mitologjisë dhe ka të bëjë me historinë e burrave krokodilë dhe krijimin e këtij personazhi të quajtur Nugu.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
