A po paralajmëron Taravari koalicion me VMRO-DPMNE?

Një ditë pas mesazhit të kryetarit të VMRO-DPMNE-së, Hristijan Mickoski, i cili shprehu gatishmërinë për të biseduar për pjesëmarrjen e opozitës shqiptare në qeverinë e ardhshme, kandidati i koalicionit VLEN për president, Arben Taravari, i cili në zgjedhjet presidenciale mori vetëm 9.21 për qind të votave, nuk e përjashtoi mundësinë një koalicioni paszgjedhor.

E zgjedhjet presidenciale të 24 prillit u konsideruar test i rëndësishëm edhe për zgjedhjet parlamentare që do të mbahen më 8 maj, së bashku me rundin e dytë të zgjedhjeve presidenciale. Kandidatja e VMRO-DPMNE-së, Gordana Silanovska-Davkova, fitoi raundin e parë të zgjedhjeve presidenciale, por votat e shqiptarëve mund të nevojiten në rundin e dytë.

“Propozimi i ardhur nga Mickoski tregon se edhe VMRO e ka kuptuar ku qëndron pesha e votës dhe deputetëve shqiptarë. Megjithatë, fokusi ynë si koalicion dhe si parti, është puna për zgjedhjet e 8 majit, për numrin më të madh të mandateve”, shkroi Taravari në “Facebook” të enjten, një ditë pas raundit të parë të zgjedhjeve presidenciale në Maqedoninë e Veriut.

“Pas zgjedhjeve, do të udhëhiqemi nga interesi kombëtar i shqiptarëve, nga nevoja urgjente për pastrim të qeverisë nga korrupsioni, dhe nga orientimi ynë i panegociueshëm pro-perëndimor. Ne si VLEN jemi më të bashkuar se kurrë. Vota jonë është shumica e votës shqiptare. Mandatet tona shkojnë për deputetë shqiptarë”, shtoi ndër të tjera Taravari në një koment të fundit.

Në Maqedoninë e Veriut ekziston një rregull i pashkruar që qeveritë të formohen nga partitë fituese shqiptare dhe maqedonase, pavarësisht orientimeve të tyre programore. Megjithatë, ky rregull u prish kur LSDM-ja edhe pse humbëse e zgjedhjeve në vitin 2017, arriti të përbëjë shumicën parlamentare me votat e partive shqiptare dhe të formojë qeverinë e re.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.