Arrestohet për korrupsion ish-drejtori i Agjencisë së Kosovës për Efiçiencë të Energjisë

Policia e Kosovës ka njoftuar se është arrestuar ish-drejtori i Agjencisë së Kosovës për Efiçiencë të Energjisë, i cili dyshohet për përfshirje në veprën penale ‘keqpërdorim i pozitës apo autoritetit zyrtar’, nën dyshimin për kontrata rreth realizimit të disa projekteve në Burgun e Dubravës, në vlerë afro 200 mijë euro.

“I dyshuari në cilësi të drejtorit të Agjencisë së Kosovës për Efiçiencë të Energjisë, ka nënshkruar kontratë rreth realizimi të disa projekteve në Burgun e Dubravës me një kompani në vlerë prej 199,500.00 €. Dyshohet se projektet në Burgun e Dubravës ishin tashmë të realizuara në vitet 2016-2018, (në Pavionin 4, vlera  271,466.66 €- realizuar në vitin 2016-2018, në Pavionin 6, vlera 233,309.00 € – realizuar në vitin 2016-2018 dhe ndriçimin e perimetrit të jashtëm të Burgut të Dubravës, Faza I, në vlerë 15,240.00 €, Faza II në vlerë 18,675.00 € dhe faza V në vlerë 20,000.00 € – realizuar në vitin 2016-2018). Vlen te ceket se në vitin 2021 ndaj personit të njëjtë ishte iniciuar një rast tjetër nga policia”, thuhet në njoftimin e Policisë.

Ndërkaq, në njoftim thuhet se hetuesit policorë nga Njësiti Rajonal për Hetimin e Krimeve Ekonomike dhe Korrupsionit – Prishtinë, në konsultim me Prokurorinë Themelore në Prishtinë, “pas disa veprimeve operative/taktike dhe hetimore, kanë arrit të sigurojnë informata dhe prova për të dyshuarin A.K., (viti i lindjes 1981, mashkull kosovar)”.

Po ashtu, bëhet me dije se i dyshuari është shoqëruar në polici, është intervistuar dhe ndaj tij është iniciuar rasti ‘keqpërdorim i pozitës apo autoritetit zyrtar’.

“Në konsultim me prokurorin kompetent, rasti do të zhvillohet në procedurë të rregullt”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.