Princ Harry pranon vrasjen e 25 personave në Afganistan

Princi Harry ka pranuar vrasjen e 25 personave në Afganistan gjatë kohës së tij si pilot i helikopterit Apache.

Kjo sipas mediave të Mbretërisë së Bashkuar, ta cilat kanë cituar një autobiografi të shkruar nga Princi e që do të publikohet së shpejti.

Harry, duka i Sussex, shërbeu në Afganistan fillimisht si një kontrollues ajror përpara sulmeve ajrore nga 2007-2008, më pas duke fluturuar me helikopterin sulmues midis viteve 2012-2013.

38-vjeçari do të publikojë një libër, Spare, në javën e ardhshme, në të cilën ai zbuloi se ndërmori gjashtë misione si pilot, të cilat e çuan në “marrjen e jetëve njerëzore”.

Harry tha se nuk ishte as krenar dhe as kishte turp që e kishte bërë këtë.

Ai gjithashtu përshkroi eliminimin e objektivave.

“Numri im është 25. Nuk është një numër që më mbush me kënaqësi, por as nuk më vë në siklet”, ka shkruar Princi.

Videokamerat e montuara në hundën e helikopterit të tij Apache i mundësuan atij të vlerësonte misionet e tij – dhe të përcaktonte me siguri se sa kishte vrarë.

Princi shpjegoi justifikimin e tij për veprimet e tij, për shkak të sulmeve të 11 shtatorit në Shtetet e Bashkuara dhe takimit me familjet e viktimave.

Ai tha se përgjegjësit dhe simpatizantët e tyre ishin “armiq të njerëzimit” dhe luftimi i tyre ishte një akt hakmarrjeje për një krim kundër njerëzimit.

Forcat e huaja të udhëhequra nga SHBA-të u tërhoqën nga Afganistani në gusht 2021 pas 20 vitesh okupim ushtarak që la të vdekur dhjetëra mijëra njerëz, kryesisht civilë.

Në librin tashmë të diskutueshëm që do të botohet më 10 janar, Harry foli për herë të parë për numrin e luftëtarëve talebanë që vrau gjatë shërbimit të tij.

Princi ka pretenduar gjithashtu se vëllai i tij i madh dhe trashëgimtari i fronit, Princi William, e rrëzoi atë në dysheme gjatë një debati të vitit 2019 për gruan e Harry-t, Meghan.

Harry zbuloi gjithashtu se vëllezërit, djemtë e mbretit Charles, i ishin lutur babait të tyre që të mos martohej me gruan e tij të dytë Camilla, tani bashkëshorte mbretëreshë, dhe se ai kishte marrë kokainë si adoleshent.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.