NBA/ Nuk ka këndellje për kampionët, Lakers rikthehen te fitorja

Orët e hershme të mëngjesit të së martës (me kohën tonë lokale), u zhvilluan edhe gjashtë takime në ligën amerikane të basketbollit, NBA.

Assesi të këndellen kampionët në fuqi të Milwaukee Bucks, të cilët pësuan humbjen e katërt brenda pesë ndeshjeve të fundit.

Bucks kësaj radhe u mposhtën në udhëtim te Atlanta Hawks, me rezultat 121:114.

Khris Middleton shënoi 34 pikë, shtatë kërcime e katër asistime për Milwaukee, por nuk arriti ta shpëtojë ekipin e tij nga humbja.

Në anën tjetër, për Atlanta-n shfaqi lojë të mirë Trae Young, duke realizuar 30 pikë e 11 asistime.

Në ndeshjen tjetër, Los Angeles Lakers rikthehet te fitorja pas tre humbjeve radhazi, të cilët mposhtën Utah Jazz me rezultat 101:95.

Ylli i Lakers, LeBron James ishte më i miri në këtë takim duke realizuar 25 pikë shtatë kërcime dhe shtatë asistime, ndërsa te skuadra e Jazz u dallua Rudy Gobert me 19 pikë e 16 asistime.

Ndërkohë, Phoenix Suns po vazhdon me formë shumë të mirë, të cilët po i prijnë tabelës në Konferencën Perëndimore.

Suns morën fitoren e katërt radhazi, duke mposhtur në udhëtim San Antonio Spurs, me rezultat 107:121.

Devin Booker ishte thjeshtë fantastik në këtë ndeshje, duke realizuar 48 pikë për Suns, derisa te skuadra e Spurs u dallua Jakob Poeltl, i cili shënoi 23 pikë e 14 kërcime.

Fitore në këtë xhiro mori edhe Miami Heat, të cilët mposhtën Toronto Raptors, me rezultat 104:99.

Në dy ndeshjet tjera të kësaj xhiroje, Portland Trail Blazers mposhti në udhëtim Orlando Magic me shifrat 98:88, si dhe Dallas Mavericks fitoi ndaj Oklahoma City Thunder me shifrat 104:102.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.