Krasniqi: Nga rrjetet sociale e kuptova se erdha në Kosovë për të më falur gjyqtari fitoren

Boksieri Robin Krasniqi ka reaguar pas kritikave se e fitoi meçin ndaj Nadjib Mohammedit të shtunën mbrëma në stadiumin “Fadil Vokrri” në Prishtinë pa meritë.

“Tani po bëhen gati 20 vite nga kur unë kam filluar me boks profesionist dhe të shtunën e 5 gushtit në mbrëmje, e zhvillova duelin e 60-të. Ndërkohë i kam fituar 2 tituj të botës, 2 tituj evropian dhe dhjetëra tituj internacional, por dje dhe sot e kuptova nga rrjetet sociale se unë nuk po e kuptoja boksin fare, madje paskam ardhur në Kosovë për të më falur gjyqtari fitoren”, thuhet në reagim e tij në Facebook.

Për Krasniqin, sipas ekspertëve të rrjeteve sociale, “individëve të caktuar, që çdo gjë bëjnë për të krijuar klikime dhe sipas komentatorëve zyrtar që e kanë komentuar duelin tim të së shtunës, unë vërtet e paskam humbur duelin dhe fitoren ma paska dhuruar gjyqtari”.

“Me këto dy grupet e para me të vërtet nuk do merrem fare, sepse është shumë në rregull nëse e kanë një pikëpamje tjetër për shkak se nuk janë profesionist të fushës, por unë pasi e shikova duelin me komentim, kam mbetur pa koment dhe vërtetë secilin nga ‘ekspertët’ e rrjeteve sociale, e kuptoj, meqë edhe ata e kanë dëgjuar atë komentim”.

Krasniqi e ka përgëzuar kundërshtarin e tij Nadjib Mohammedi për luftën e tij të përzemërt dhe “për duelin e madh që ma dhuroi”.

“Pa kundërshtar cilësor nuk ka duel cilësor, por ai jo vetëm që humbi me pikë, por u diskualifikua shumë më vonë se që u desh të diskulifikohej, sepse boksi nuk është MMA”, shtoi ai.

“Unë ose boksoj ndaj një kundërshtari cilësor, ose nuk boksoi fare, andaj qëllimi im dhe i ekipit tim ka qenë gjithmonë që të sjellim kundërshtar të nivelit të lartë botëror në Kosovë dhe këtë e kemi bërë”.

Ai ka adresuar kritika edhe ndaj analistit Afrim Majanci i cili e kishte cilësuar fitoren e Krasniqit “si skandaloze”.

“Ky zotëria në këtë duel asnjë goditje timen të pastër nuk e paska komentuar, madje as goditjet nga të cilat është dridhur kundërshtari në 3 raundet e para nuk i paska vërejtur. Ndërkaq goditjet pas koke, goditjet me pjesën e brendshme të dorëzave dhe shumë goditje të tjera të pa-pastra, e të palejuara, të kundërshtarit tim nuk i komentoi aspak. Edhe më skandaloze është se ky zotëria as qortimet dhe heqjen e pikëve të kundërshtarit nga gjyqtari nuk i kishte parë fare dhe nuk i paska komentuar”.

“Unë nuk e di për çfarë arsye ky zotëri ia paska ‘huq’ aq fort, por më vjen sinqerisht keq për tifozët e boksit të cilët drejtpërdrejt janë keq-informuar, sepse zëri i komentuesit natyrisht se ndikon shumë tek vlerësimi final i një teleshikuesi”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.