Zgjerimi i NATO-s nuk është fajtor për pushtimin rus, thotë Bill Clinton

Ish-presidenti amerikan, Bill Clinton, hodhi poshtë nocionin se zgjerimi i NATO-s që filloi gjatë presidencës së tij, është fajtore për pushtimin rus të Ukrainës.

“Mendoj se bëmë gjënë e duhur në kohën e duhur. Dhe nëse nuk do ta kishim bërë, kjo krizë mund të kishte ndodhur edhe më shpejt”, tha ai në një intervistë që u transmetua të dielën në “Fareed Zakaria GPS” të rrjetit amerikan “CNN”.

Kritikët kanë argumentuar se cenimi i vazhdueshëm nga NATO në kufijtë e Rusisë bëri që presidenti rus, Vladimir Putin, të merrte vendimin për luftën në Ukrainën.

Clinton tha se Putin “nuk e fshehu faktin se ai mendonte se shpërbërja e Bashkimit Sovjetik ishte një tragjedi e madhe”.

Ish-presidenti tha se SHBA-të dhe NATO nuk kishin për qëllim kurrë të kërcënonin Rusinë dhe se kombet e Evropës Lindore kishin të drejtë të jetonin në siguri pas dekadash të dominuara nga Rusia.

“Kur bëra atë që bëra”, tha Clinton, “i ofrova Rusisë jo vetëm një partneritet special me NATO-n, por edhe perspektivën e anëtarësimit eventual në NATO, duke argumentuar se problemet tona më të mëdha të sigurisë në të ardhmen do të vinin nga aktorë joshtetërore ose nga shtete autoritare që u shesin mjete kimike, biologjike dhe bërthamore grupeve terroriste”.

Zgjedhja e Clintonit në vitin 1992 erdhi si pasojë e fundit të Luftës së Ftohtë.

Kombet e Evropës Lindore kishin hedhur poshtë dekada të diktaturës komuniste në vitin 1989 dhe Presidenti Mikhail Gorbachev kishte shpërbërë Bashkimin Sovjetik në 1991.

Gjatë presidencës së Clintonit, Republika Çeke, Hungaria dhe Polonia iu bashkuan NATO-s, e ndjekur në 2004 nga Bullgaria, Estonia, Letonia, Lituania, Rumania, Sllovakia dhe Sllovenia.

Të gjitha ato kombe kishin qenë ose pjesë e Bashkimit Sovjetik ose aleatë të Bashkimit Sovjetik.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.