Von Cramon kërkon që Serbia t’i lirojë kosovarët në kufi: Mos e turpëroni veten

Raportuesja për Kosovën në Parlamentin Evropian, Viola von Cramon, ka bërë thirrje që Serbia t’i lirojë menjëherë shtetasit e Kosovës nga pikëkalimet kufitare të Serbisë.

Ajo përmes një shkrimi në rrjetin social ‘X’ ka thënë se Serbia s’duhet të vazhdojë ta turpërojë veten.

“Serbia duhet të ndalë së turpëruari veten dhe menjëherë t’i lirojë mbajtësit e pasaportave dhe letërnjoftimeve të Kosovës që të kalojnë kufirin Serbi-Kroaci në Batrovc. Liria e lëvizjes duhet të sigurohet për të gjithë, pa diskriminim në baza kombësie”, ka shkruar ajo.

Serbia should stop embarrassing itself and immediately let Kosovo 🇽🇰 ID/passport holders pass the Batrovci 🇷🇸 – 🇭🇷 border!

Freedom of movement of all must be ensured, with no discrimination based on nationality. https://t.co/Fd4CJei7Xn

— Viola von Cramon 🇺🇦🇪🇺🇮🇱 (@ViolavonCramon) April 17, 2024

Ministria e Punëve të Jashtme dhe Diasporës dhe Ministria e Punëve të Brendshme kanë njoftuar se pas situatës së krijuar në pikat kufitare në Serbi dhe ndaljes arbitrare të qytetarëve të Kosovës në vendkalime kufitare, të gjithë bashkatdhetarët dhe qytetarët që janë në lëvizje të evitojnë me çdo kusht kalimin nëpër Serbi.

“MPJD dhe MPB janë duke ndërmarrë veprimet e nevojshme dhe do t’iu mbajnë të informuar rreth detajeve të reja. Të gjithë udhëtarët luten që të ndjekin me vëmendje situatën e tensionuar të sigurisë dhe të mos udhëtojnë përmes Serbisë”, thuhet në njoftim.

Paraprakisht, Fatmir Haxholli, sekretar i zyrës ndërlidhëse të Kosovës në Serbi, nëpërmjet një postimi në “Facebook” tha se mbi 300 qytetarë të Kosovës janë bllokuar në Serbi në pikëkalimin kufitar me Kroacinë, derisa shtoi se kjo lëvizje absurde e autoriteteve serbe erdhi në shenjë hakmarrjeje ndaj votimit në favor të Kosovës në Asamblenë Parlamentare të Këshillit të Evropës.

Haxholli njoftoi ndër të tjera se autoritetet serbe ua kanë marrë pasaportat dhe dokumentacionet e udhëtimit qytetarëve kosovarë, ndërsa e cilësoi shkelje flagrante të marrëveshjeve të arritura në kuadër të dialogut për normalizimin e marrëdhënieve Kosovë-Serbi për lirinë e lëvizjes dhe njohjen e ndërsjellë të dokumentacioneve nën kujdesin e Bashkimit Evropian (BE).

Serbia bllokon rreth 300 kosovarë: “Hakmarrje ndaj votimit pro Kosovës në Këshillin e Evropës”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.