Vijojnë përleshjet mes policisë izraelite dhe palestinezëve në Jeruzalem

Vijojnë përleshjet midis palestinezëve dhe policisë izraelite jashtë Qytetit të Vjetër të Jeruzalemit.

Nga ana palestineze thuhet se 80 persona kanë mbetur të plagosur.

Autoritetet islamike vlerësuan se 90 mijë njerëz ishin mbledhur për lutjet e natës në xhaminë al-Aqsa të qytetit të shenjtë, vendi i tretë më i shenjtë në Islam.

Dhuna erdhi një ditë pasi më shumë se 200 njerëz u plagosën në luftimet përreth xhamisë, duke shkaktuar thirrje ndërkombëtare për qetësi.

Tensionet në Jeruzalem janë rritur në ditët e fundit, përpara një vendimi  të gjykatës izraelite nëse autoritetet mund të dëbojnë dhjetëra palestinezë nga lagja Sheikh Jarrah.

Palestinezët janë ankuar gjithashtu për kufizime gjatë muajit të shenjtë mysliman të Ramazanit.

Policia mbrojti veprimet e saj pasi shpërndau protestën në Sheik Jarrah, ku demonstruesit kishin hedhur gurë ndaj forcave të sigurisë.

Më parë, përpara Natës së Kadrit, e konsideruar si nata më e shenjtë gjatë Ramazanit, policia kishte bllokuar ngarkesat e autobusëve të pelegrinëve që drejtoheshin për në Jeruzalem .

Në kufirin me Gaza, trupat qëlluan me lot në drejtim të protestuesve palestinezë, pasi zyrtarët thanë se tre tullumbace flakëruese u nisën në Izrael, duke shkaktuar zjarre por pa lëndime.

Nisja e trazirave

Të premten, policia e trazirave sulmoi kompleksin e xhamisë al-Aqsa pasi ata thanë se palestinezët hodhën gurë dhe fishekzjarre mbi oficerët. Kryeministri izraelit, Benjamin Netanyahu, mbrojti veprimet e policisë.

“Izraeli po vepron me përgjegjësi për të siguruar respektimin e ligjit dhe rendit në Jeruzalem ndërsa lejon lirinë e adhurimit”, tha ai në një takim të zyrtarëve të sigurisë.

Jeruzalemi ka qenë prej kohësh qendra e krizës izraelito-palestineze, me vendet e tij të shenjta të nderuara nga hebrenjtë dhe myslimanët.

Muri Perëndimor i Qytetit të Vjetër bën pjesë në vendin më të shenjtë në Judaizëm – Mount Temple.

Palestinezët kanë mbajtur protesta natën në Sheikh Jarrah kundër një përpjekjeje nga kolonët izraelitë për të marrë shtëpitë arabe.

Të shtunën, protestuesit brohorisnin, tundnin flamuj palestinezë dhe hidhnin gurë përpara se të hynte policia.

Dhjetëra protestues arabë izraelitë gjithashtu u mblodhën në të gjithë Izraelin për tu solidarizuar me banorët e Sheikh Jarrah, duke mbajtur tabela që shkruanin “pushtimi është terrorizëm”.

Reagimet

Lëvizja islamiste Hamas, e cila sundon Gaza, u bëri thirrje palestinezëve të qëndrojnë në al-Aqsa derisa të mbarojë Ramazani, duke paralajmëruar se “rezistenca është e gatshme për të mbrojtur al-Aqsa me çdo kusht”.

Kuarteti i të dërguarve nga Bashkimi Evropian, Rusia, SHBA-të dhe Kombet e Bashkuara shprehën “shqetësim të thellë” për dhunën.

Shtetet e Bashkuara thanë se ishin “jashtëzakonisht të shqetësuara” dhe i nxitën të dy palët “të shmangin hapat që përkeqësojnë tensionet”.

Bashkimi Evropian u bëri thirrje autoriteteve “të veprojnë urgjentisht për të de-përshkallëzuar tensionet aktuale”.

Presidenti palestinez, Mahmoud Abbas, tha se ai e konsideroi qeverinë izraelite përgjegjëse për trazirat dhe shprehu “mbështetjen e plotë për heronjtë në al-Aqsa”.

Yair Lapid, një politikan izraelit që përpiqet të formojë një qeveri koalicioni për të zëvendësuar Netanyahun, mbështeti policinë.

Presidenti i Turqisë, Recep Tayyip Erdoğan, denoncoi Izraelin si një “shtet të egër terrorist” në një fjalim në Ankara. Ai i bëri thirrje OKB-së të ndërhyjë për të “ndaluar persekutimin”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.