Versioni i ri i Trump, e krahason veten me Navalny-n

Donald Trump, pas tre ditësh heshtje, ka komentuar vdekjen e Alexei Navalny-t.

Por në mënyrën e tij.

E krahasoi veten me kundërshtarin e Kremlinit që vdiq në një burg të largët rus.

Dhe përfitoi nga kjo për të rinisur temat e fushatës së tij elektorale: emergjenca e emigrantëve, mashtrimi zgjedhor dhe persekutimi gjyqësor.

Të gjitha, pa dënuar Kremlinin apo duke përmendur ndonjë Vladimir Putin.

Pas paralajmërimit për vendet e NATO-s që mbeten prapa në shpenzimet ushtarake, gjë që do të “inkurajonte” Rusinë “të bëjë çfarëdo” me aleatët e saj në Atlantik, Trump dërgoi një tjetër mesazh të paqartë.

“Vdekja e papritur e Aleksej Navalny-t më ka bërë gjithnjë e më të vetëdijshëm për atë që po ndodh në vendin tonë. Një përparim i ngadalshëm, përmes politikanëve, prokurorëve dhe gjyqtarëve të majtë të korruptuar dhe radikalë, që po çon drejt shkatërrimit. Ne jemi një komb në rënie”, ka thënë ai.

Kjo, teksa flitet gjithnjë e më shumë për një rrymë Putiniste në Washington.

Liz Cheney, vajza e ish-zëvendëspresidentit republikan Dick Cheney dhe një ish-anëtare kryesore e partisë, e akuzoi drejtpërdrejt atë.

“Mendoj se ne duhet ta marrim shumë seriozisht Donald Trump-in. Duhet ta bëjmë gjithashtu sepse tani ka një krah Putinist në Partinë Republikane”.

“Besoj se në zgjedhjet e ardhshme do të duhet të sigurohemi që ky krah të mos marrë krahun perëndimor të Shtëpisë së Bardhë”.

Krahu Perëndimor është zemra e rezidencës presidenciale, ku ndodhen Zyra Ovale, zyra personale e presidentit dhe ajo për emergjencat dhe informimet e inteligjencës.

Dy muaj më parë, udhëheqësi demokrat në Dhomë Hakeem Jeffries kishte treguar dy emra në krye të fraksionit të ri pro-Putin: Marjorie Taylor Greene dhe Jim Jordan.

I pari është një teoricien konspirativ i zgjedhur në Georgia, i bindur se zjarret në pyje shkaktohen nga lazerët hapësinorë dhe që e quajti Gestapon “gazpacho”, duke ngatërruar supën andaluziane me policinë sekrete të Gjermanisë naziste.

Jordan është një ish-asistent trajner i ekipit të mundjes në Universitetin Shtetëror të Ohajos, i akuzuar se ka mbyllur sytë ndaj abuzimit të atletëve nga trajneri për vite me radhë.

Biografitë e tyre mund të largojnë vëmendjen: pas Greene dhe Jordan është ajo që demokratët e quajnë “Departamenti Pro-Putin”, rryma Putiniste, për të cilën akuzoi Matt Gaetz, përfaqësues i Floridës dhe një nga liderët e së djathtës ekstreme të partisë se në të kaluarën kishte pasur marrëdhënie seksuale me pagesë me të mitur.

Atyre u është bashkuar edhe Kryetari, Mike Johnson, i cili kundërshtoi ligjin dypartiak të miratuar nga Senati për të garantuar ndihmën ushtarake për Kievin.

Ndërkohë, Liz Cheney ka paralajmëruar se nëse ai fiton në nëntor, Trump mund të anulojë angazhimet e Washingtonit ndaj NATO-s.

“Nuk mund të imagjinoj ndonjë president tjetër amerikan të thotë gjërat që tha ai për Aleancën Atlantike. Është një pozicion krejtësisht i rrezikshëm”.

Marrë nga “La Repubblica”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.