Ushtria e Myanmarit nderon murgun anti-mysliman, liron të burgosurit

Një murg ultranacionalist në Myanmar, i cili dikur u quajt “fytyra e terrorit budist” për rolin e tij në nxitjen e urrejtjes fetare kundër myslimanëve, ka marrë një çmim prestigjioz kombëtar ndërsa sundimtarët ushtarakë të vendit festojnë pavarësinë nga Britania.

Murgut, Wirathu, iu dha titulli nderi “Thiri Pyanchi” për “punën e tij të jashtëzakonshme për të mirën e Unionit të Myanmarit”, tha ekipi i informacionit i ushtrisë të martën, përpara festimeve të ditës së pavarësisë së vendit.

I prezantuar me çmimin nga sundimtari ushtarak i vendit, gjenerali Min Aung Hlaing, Wirathu ishte në mesin e qindra njerëzve që morën tituj nderi dhe forma të tjera njohjeje pasi vendi shënoi të mërkurën 75 vjetorin e pavarësisë nga Britania.

Wirathu ka qenë prej kohësh i njohur për retorikën e tij ultra-nacionaliste dhe anti-islame – veçanërisht kundër pakicës myslimane Rohingya të Myanmarit. Në vitin 2013, ai u shfaq në kopertinën e revistës “Time” me titullin, “Fytyra e Terrorit Budist”.

Ai ka bërë thirrje për bojkot të bizneseve në pronësi myslimane dhe kufizime në martesat mes budistëve dhe myslimanëve.

Grupet e të drejtave të njeriut kanë akuzuar Wirathu se ka ndihmuar në nxitjen e armiqësisë ndaj komunitetit Rohingya, duke hedhur themelet për një operacion ushtarak në vitin 2017 që detyroi rreth 740 mijë Rohingya të iknin përtej kufirit në Bangladesh.

Disa mijëra të burgosur ishin planifikuar gjithashtu të liroheshin për të shënuar rastin kombëtar të mërkurën, sipas mediave lokale dhe një zëdhënësi të qeverisë, megjithëse nuk dihej nëse të burgosurit politikë do të ishin në mesin e 7 mijë e 12 të raportuarve që do të liroheshin.

Shefi ushtarak Min Aung Hlaing përdori gjithashtu festimet e ditës së pavarësisë të së mërkurës për të sulmuar vendet për ndërhyrje në punët e vendit të tij, ndërsa falënderoi të tjerët për bashkëpunimin “pozitiv”, përkatësisht Kinën, Indinë, Tajlandën, Laosin dhe Bangladeshin.

“Dua të falënderoj disa vende dhe organizata dhe individë ndërkombëtarë dhe rajonalë që bashkëpunuan pozitivisht me ne, në mes të gjithë presioneve, kritikave dhe sulmeve”, tha udhëheqësi ushtarak në një fjalim televiziv për të shënuar ditën e pavarësisë.

Myanmari ka qenë në kaos që nga grushti i shtetit ushtarak në shkurt 2021, ku qeveria e zgjedhur në mënyrë demokratike e Aung San Suu Kyi-t u ndalua së bashku me zyrtarë të tjerë kyç.

Ushtria u është përgjigjur gjithashtu protestave pro-demokracisë dhe mospajtimit me forcë vdekjeprurëse, duke burgosur mijëra dhe duke luftuar një konflikt në rritje me një lëvizje kundër grushtit të shtetit që ka rezultuar në qindra mijëra njerëz të zhvendosur.

Ndërsa protestat në rrugë tani janë të rralla për shkak të represionit ushtarak, ushtria përfshihet në përleshje pothuajse të përditshme me të ashtuquajturën Forca e Mbrojtjes së Popullit, e cila ka marrë armët për të luftuar për një kthim në demokraci, si dhe me forcat etnike të pakicave.

Këshilli i Sigurimit i OKB-së miratoi muajin e kaluar rezolutën e tij të parë për Myanmarin në 74 vjet, duke kërkuar fundin e dhunës në vend dhe që regjimi ushtarak të lirojë të gjithë të burgosurit politikë. Kina dhe Rusia abstenuan nga rezoluta e Këshillit të Sigurimit, ashtu si edhe India.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.