Turqia trefishon taksat e naftës teksa Erdogan kërkon të përmirësojë financat publike

Turqia ka trefishuar taksat e naftës teksa qeveria përpiqet të mbledhë para për të rimbursuar koston e dhuratave të mëdha përpara zgjedhjeve të majit dhe rindërtimin e fondeve që kushtojnë deri në 100 miliardë dollarë pas tërmetit shkatërrues të shkurtit.

Taksat për benzinën u rritën me rreth 200 për qind në 7.53 TL për litër.

Sakaq, lëvizja ka rritur edhe çmimet e benzinës me rreth 20 për qind, sipas të dhënave nga kompania shtetërore e naftës Turkish Petroleum.

Rritja e taksave është e fundit në një seri masash të shpallura nga Presidenti Recep Tajip Erdogan që nga rizgjedhja e tij më 28 maj.

Taksat mbi vlerën e shtuar për një shumëllojshmëri të gjerë mallrash dhe shërbimesh u rritën në fillim të këtij muaji pasi ekipi i ri ekonomik i Erdogan-it është zotuar për “politika racionale”, pas vitesh masash jo-konvencionale që e shtynë ekonominë e Turqisë prej 900 miliardë dollarësh në krizë.

Ndërkohë, rritja e TVSH-së dhe taksave të karburantit do të shtojë barrën financiare për turqit, të cilët janë përballur me një periudhë të zgjatur inflacioni të lartë dhe kanë parë që lira të zhvlerësohet thuajse 30 për qind kundrejt dollarit amerikan vetëm këtë vit.

Presidenti do të udhëtojë këtë javë në Arabinë Saudite, Katar dhe Emiratet e Bashkuara Arabe, ndërsa synon të tërheqë investime të reja nga vendet e Gjirit.

Inflacioni ra në 38.2 për qind në vit në qershor nga kulmi i tetorit 2022 prej 85.5 për qind në vit, por ekonomistët shqetësohen se lira e dobët dhe taksat e reja do ta kthejnë atë përsëri.

Politika më e shtrënguar fiskale është pjesë e një përpjekjeje të shumëfishtë nga ministri i Financave Mehmet Shimşek, i cili u emërua në qershor, për të tërhequr ekonominë e Turqisë në një rrugë të qëndrueshme.

Erdogan pati shpenzime përpara zgjedhjeve të majit, duke dhuruar një muaj gaz natyror falas dhe duke rritur pagat dhe pensionet e sektorit publik.

Gjithashtu Turqia po përballet me një faturë deri në 100 miliardë dollarë për të rindërtuar një zonë të madhe në jug që u dëmtua rëndë nga tërmeti i shkurtit.

Ndërkaq, ekonomistët presin që deficiti buxhetor i qeverisë të rritet në 4.4 për qind të produktit të brendshëm bruto këtë vit, nga vetëm 0.9 për qind në vitin 2022, sipas një sondazhi të FactSet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.