Trajneri i Manchester United, Erik ten Hag, thotë se ishte “e papranueshme” që disa lojtarë, përfshirë Cristiano Ronaldo, u larguan herët nga miqësorja e së dielës në Old Trafford kundër Rayo Vallecano.
Ronaldo, në ndeshjen e tij të parë parasezonale, ishte zëvendësuar në pjesën e parë.
Ai u fotografua duke u larguar me Diogo Dalot, i cili nuk ishte inkuadruar në lojë.
“Ne jemi një ekip dhe kjo do të thotë që të qëndrojmë deri në fund”, tha Ten Hag për Viaplay.
“Kjo është e papranueshme, për të gjithë ata që janë të përfshirë”.
United barazoi ndeshjen 1-1, me Ronaldo-n që nuk arriti të shënonte me gol rikthimin e tij në lojë.
37-vjeçari, i cili u rikthye në United sezonin e kaluar pas periudhave me Real Madrid-in dhe Juventus-in, është i prirur të largohet nga klubi për të ndjekur dëshirën e tij për të konkurruar në Ligën e Kampionëve.
Dhe ai u lejua të humbasë turneun parasezonal të United në Tajlandë dhe Australi për arsye personale.
Ten Hag ka thënë më parë se Ronaldo “nuk është në shitje” dhe mbetet “në planet tona”.
Nënshkrimet e reja Christian Eriksen dhe Lisandro Martinez u paraqitën të dy për një orë kundër Rayo-s, në një lojë të organizuar nga Ten Hag për lojtarët që nuk ishin përfshirë gjerësisht në humbjen 1-0 të së shtunës nga Atletico Madrid në Oslo.
United hap sezonin e tyre 2022-23 në Premier League në shtëpi ndaj Brighton të dielën, më 7 gusht.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
