Të gjelbrit francezë dhe lideri i ekstremit të majtë Melenchon, marrëveshje përpara zgjedhjeve legjislative

LFI (La France Insoumise), lëvizja e liderit të ekstremit të majtë Jean-Luc Melenchon, arriti një marrëveshje me partinë e gjelbër të Francës EELV.

Këtë bënë të ditur të hënën politikanët nga të dyja palët, ndërsa e majta kërkon të formojë një front të përbashkët kundër presidentit Emmanuel Macron në zgjedhjet e ardhshme parlamentare.

“Moment historik. Marrëveshja midis LFI-së dhe EELV-së është përfunduar”, tha ligjvënësi Adrien Quatennens, një nga koordinatorët e fushatës së LFI-së.

Manon Aubry, anëtare e LFI-së në parlamentin e BE-së, për radion “France Info” tha gjithashtu se: “Ky është një bashkim popullor rreth një programi të përbashkët për të qeverisur së bashku, sepse ky është qëllimi”.

Partitë opozitare në të majtën dhe të djathtën e spektrit politik të Francës po përpiqen të krijojnë aleanca për të mposhtur partinë e Macron “La Republique en Marche” në votimin parlamentar të qershorit.

Mediat franceze raportuan të hënën se EELV-ja kishte miratuar një tekst që detajonte marrëveshjen me LFI-në të dielën, duke e quajtur atë “ekologjinë e re popullore dhe bashkimin social”.

Masa vjen pasi Melenchon, i cili doli i treti në zgjedhjet presidenciale të prillit dhe mezi humbi balotazhin pas populistes së ekstremit të djathtë Marine Le Pen, u bëri thirrje të gjitha partive me prirje të majtë që të bashkojnë forcat me lëvizjen e tij për të “zgjedhur (atë) kryeministër”.

Marrëveshja LFI-EELV përfshin synimet për uljen e moshës së pensionit në 60 vjeç, rritjen e pagës minimale dhe kufizimin e çmimeve për produktet thelbësore, tha Manon Aubry, duke shtuar se marrëveshjet me partitë e tjera të së majtës do të pasonin.

Manuel Bompard, zëdhënës i fushatës së Melenchon, të hënën i tha radios “France Inter” se bisedimet me partitë e tjera do të vazhdojnë “në orët e ardhshme”.

Gjatë protestave të 1 majit të dielën, Melenchon u pa gjithashtu duke përqafuar Olivier Faure, kreun e Partisë Socialiste të Francës, një shenjë e unitetit të mundshëm pasi bisedimet midis LFI-së dhe socialistëve ngecën javën e kaluar.

Melenchon, vetë dikur anëtar i socialistëve përpara se të largohej nga partia në një grindje për qëndrimin e saj ndaj Bashkimit Evropian, ka shkaktuar një grindje afatgjatë brenda së majtës. Socialistët janë më pro BE-së se ai.

LFI dhe EELV thanë në një deklaratë të përbashkët se të dy donin t’i jepnin fund kursit “neoliberal” të BE-së dhe, në vend të kësaj, do të synonin “për një projekt të ri në shërbim të ndërtimit ekologjik dhe social”.

Sipas sondazheve të para të opinionit përpara zgjedhjeve parlamentare në qershor, një aleancë e krahut të majtë nuk do të arrinte shumicën kundër bllokut që mbështet Macron.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.