Shumica e të rinjve në Japoni refuzojnë martesën, tregon sondazhi

Një përqindje rekord e burrave dhe grave në Japoni thonë se nuk kanë ndërmend të martohen, një prirje që ekspertët kanë paralajmëruar se do të minojë përpjekjet për të trajtuar krizën e popullsisë në vend.

Instituti Kombëtar i Popullsisë dhe Sigurimeve Shoqërore – një organ i lidhur me qeverinë në Tokio – tha se rezultatet e sondazhit të tij të vitit 2021, të botuar këtë muaj, do të shtonin shqetësimet për shkallën e ulët të lindjeve.

Sipas sondazhit, 17.3% e meshkujve dhe 14.6% e femrave të moshës 18-34 vjeç thanë se nuk kishin ndërmend të lidhnin kurrë martesën – shifra më e lartë që kur pyetësori u krye për herë të parë në 1982.

Në atë sondazh, të bërë pak para rritjes së ekonomisë së flluskës në mesin e viteve 1980, vetëm 2.3% e burrave dhe 4.1% e grave thanë se nuk do të martoheshin kurrë.

Rënia e martesave ka pasur pasoja për shkallën e lindshmërisë së Japonisë, pasi ajo përballet me perspektivën e shpopullimit dramatik dhe tkurrjes së fuqisë punëtore dhe ekonomisë.

Ekspertët ia atribuojnë prirjen disa faktorëve, duke përfshirë një dëshirë në rritje midis grave të reja që punojnë për të shijuar liritë që vijnë nga të qenit beqare dhe të pasurit një karrierë.

Burrat thonë se u pëlqen edhe të qenit beqarë, por shprehin edhe shqetësimin për sigurinë e punës dhe aftësinë e tyre për të siguruar një familje. Ekspertët i kanë bërë thirrje qeverisë që ta bëjë më të lehtë kthimin e grave në punë pas lindjes së fëmijëve dhe të adresojë orët jashtëzakonisht të gjata të punës në Japoni.

Të pyetur se çfarë përbënte një mënyrë jetese “ideale” për gratë, pothuajse 40% e meshkujve beqarë të anketuar dhe 34% e femrave beqare përmendën aftësinë për të balancuar një karrierë me rritjen e fëmijëve. Në shenjë të ndryshimit të qëndrimeve ndaj roleve gjinore, më pak se 7% e meshkujve thanë se do të dëshironin që bashkëshorti i tyre i ardhshëm të qëndronte në shtëpi për t’u kujdesur për familjen.

Shigeki Matsuda, një profesor i sociologjisë në Universitetin Chukyo në Japoninë qendrore, tha se trendi në rënie i martesës do të ndikonte negativisht në shkallën e lindjeve.

“Qeveria japoneze ka punuar për të rritur shkallën e lindjeve duke u përpjekur të ndihmojë ata që dëshirojnë të martohen ose të kenë fëmijë të përmbushin aspiratat e tyre”, tha ai për gazetën “Mainichi Shimbun”.

Numri i foshnjave të lindura në Japoni në vitin 2021 ra me 29 mijë e 231, ose 3,5%, nga viti i kaluar në një rekord të ulët prej 811 mijë e 604, tha Ministria e Shëndetësisë në qershor. Numri i martesave ra me 24 mijë e 391 në 501 mijë e 116, shifra më e ulët që nga fundi i Luftës së Dytë Botërore.

Të dhënat e qeverisë të publikuara në maj treguan se popullsia e Japonisë ra me një rekord 644 mijë vitin e kaluar – viti i 11-të radhazi i rënies. Të dhënat nxitën një ndërhyrje nga Elon Musk, i cili paralajmëroi se Japonia “do të pushonte së ekzistuari” nëse nuk relaksonte rregullat për imigracionin dhe nuk bënte më shumë për të promovuar një ekuilibër më të shëndetshëm punë-jetë.

Shefi ekzekutiv i Tesla-s u kritikua në mediat sociale për “reagimin e tepruar” dhe veçimin e Japonisë, duke qenë se ajo nuk është e vetmja ekonomi e zhvilluar që përjeton rënie afatgjatë të popullsisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.