SHBA-të dhe BE-ja po nisin një projekt të madh infrastrukturor për të konkurruar me Kinën

Bashkimi Evropian, Shtetet e Bashkuara të Amerikës dhe vendet e tjera partnere kanë nisur një projekt të madh hekurudhor dhe detar që duhet të lidhë Evropën me Lindjen e Mesme dhe Indinë, tha presidenti amerikan Joe Biden në samitin e G20 në New Delhi.

Presidentja e Komisionit Evropian Ursula von der Leyen e quajti projektin “historik”, duke shtuar se lidhja hekurudhore do të rrisë tregtinë midis BE-së dhe Indisë me 40 për qind.

Shtëpia e Bardhë njoftoi më herët të shtunën se SHBA-të, BE-ja, India, Arabia Saudite dhe Emiratet e Bashkuara Arabe duhet të miratojnë letrën e qëllimit.

Qëllimi i një sipërmarrjeje të tillë është të “gjenerojë rritje ekonomike, stimuj për investime të reja dhe integrim të avancuar rajonal”, tha Jake Sullivan, këshilltar për sigurinë kombëtare të SHBA-ve.

“Ne mendojmë se vetë projekti është i guximshëm dhe frymëzues, por vizioni pas projektit është po aq i guximshëm dhe frymëzues”, u tha ai gazetarëve në samit.

Portali i lajmeve Axios raportoi më parë se kjo është një nga “iniciativat kryesore” të Washington-it që synon të frenojë ndikimin e Kinës në Lindjen e Mesme.

Me iniciativën e quajtur “Një brez, një rrugë”, Pekini mbështet projektet infrastrukturore në mbarë botën, prandaj Kina ka lidhur marrëveshje të shumta me pothuajse të gjitha vendet arabe, kujton dpa.

Nisma “Një brez, një rrugë” e nisur në vitin 2013 është një strategji globale e infrastrukturës dhe zhvillimit që synon të lidhë Azinë, Afrikën dhe Evropën përmes një rrjeti rrugësh tregtare tokësore dhe detare.

Ishte një pikë kthese e rëndësishme në politikën e jashtme të Kinës dhe u bë një nga nismat më ambicioze dhe më të gjera të zhvillimit në histori.

Perëndimi, dhe veçanërisht Shtetet e Bashkuara të Amerikës, e konsiderojnë atë një përpjekje jo shumë delikate nga Pekini për të riformuar rendet politike rajonale në avantazhin e tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.