Rama: Investimi në landfillin e Beratit, në përputhje me standardet evropiane

Kryeministri i Shqipërisë, Edi Rama, ka inauguruar përfundimin e punimeve në fushën e re sanitare të mbetjeve urbane në Berat.

Numri një i qeverisë shqiptare, të hënën e 19 korrikut, bëri me dije se “ky investim i mundëson Bashkisë Berat depozitimin e mbetjeve me standarde mjedisore evropiane”.

Së bashku me kreun e qeverisë ishte dhe kryetari i Bashkisë së Beratit, Ervin Demo, dhe ministri i Turizmit dhe Mjedisit, Blendi Klosi.

Më tej, Rama ka theksuar faktin se më në fund mbyllet plaga gangrenoze dhjetëravjeçare e plehrave të lëna rrugëve “në këtë zonë të bekuar”.

Në përfundim, Kryeministri deklaroi se kjo do t’i paraprijë një investimi më të madh në ndërtimin e fushës sanitare rajonale të mbetjeve. E gjitha kjo do të mbulojë disa bashki.

Landfilli i Beratit

Ky landfill është pjesë e programit të quajtur Rilindja Mjedisore, ku tashmë janë rehabilituar disa qytete, ndërsa në proces janë Durrësi, Vlora dhe, së fundmi, Berati.

Investimi parashikon të japë zgjidhje jo vetëm për Beratin, por edhe për Skraparin, Poliçanin, Kuçovën dhe Urën Vajgurore.

Kryeministri Rama më herët është shprehur se zona do të kthehet në një mjedis të gjelbër.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.