Qeveria ratifikon marrëveshjen për urën që lidh Shqipërinë me Malin e Zi

Qeveria shqiptare ratifikoi në Këshillin e Ministrave marrëveshjën për urën që do të ndërtohet mbi lumin Bunë dhe që do të lidhë Shqipërinë me Malin e Zi.

Kjo e fundit u nënshkrua mes qeverive më 27 shkurt gjatë mbledhjes së përbashkët të kabineteve.

Lajmi u bë i ditur nga zëvendës kryeministrja dhe ministrja për Infrastrukturën dhe Energjinë, Belinda Balluku.

Një projekt i përbashkët u prezantua fillimisht vitin e kaluar pas takimit që pati kryeministri i Shqipërisë, Edi Rama dhe ai i Malit të Zi, Dritan Abazoviç.

Asokohe krerët qeveritarë specifikuan se deri në vitin 2024 dy Qeveritë do të ndërtojnë një urë mbi lumin Buna, e cila do të lidhë Ulqinin dhe vendpushimin e Velipojës në Shqipëri.

Vetë ministrja Balluku, u shpreh se projekti u përqafua nga Shqipëria sepse çon përpara turizmin dhe prodhon ekonomi qarkulluese.

“Në këtë pikë të projektit qeveria ka marrë përsipër prodhimin”, tha ajo për mediat pas firmosjes së kontratës.

Për Ballukun, projekti kërkon një angazhim të vërtetë financiar nga të dyja qeveritë.

Ajo ndau edhe disa detaje që u akorduan gjatë takimit të sotëm, siç është edhe mënyra e financimit.

Kështu është bërë me dije se investimi do të ndahet 50 me 50 midis palëve.

“Është një urë 300 metra e gjatë dhe sigurisht është projektuar që të mbrojë ambientin ku ndodhet sepse ndodhet në një zonë të mbrojtur”.

Zëvendës kryeministrja shtoi se dy Qeveritë do të provojnë të kenë një mbështetje nga Bashkimi Evropian për të pasur një lloj mundësie që të jetë e ndarë midis grandit dhe kredisë.

“Ne kemi tashmë një eksperiencë, e kemi bërë këtë me Kosovën, sa i përket hekurudhës Durrës-Prishtinë”.

Balluku specifikoi se, në 12 muajt e ardhshëm mund të kemi një afat të saktë se kur mund të fillojë ndërtimi, ndërsa kostoja nuk mund të thuhet sepse duhet të jetë një projekt inxhinierik i mirëfilltë që të vlerësohet sa do të jetë 50 për qind që do të paguhet nga Shqipëri.

Siç është thënë edhe më parë, ura do të ketë dy korsi të gjera më pak se katër metra dhe do të përfshijë trotuare dhe shtigje për biçikleta.

Në projektin fillestar tregohet se lartësia mesatare e urës në raport me nivelin më të lartë të ujit do të jetë rreth 10 metra për të mos ndërhyrë në qarkullimin lumor.

Rruga aktuale që lidh këto dy pika është rreth 73 kilometra, por Velipoja dhe Ulqini do të jenë shumë pranë njëra – tjetrës me ndërtimin e urës, konkretisht do të reduktohet në vetëm 1 km.

Ura do të lidhë 34 kilometra plazhe me rërë, të cilat vizitohen nga rreth 530 mijë turistë çdo vit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.