Rusia ditë më parë ka lëshuar urdhërarrest për tre pjesëtarë të Policisë së Kosovës, për të cilët ka kërkuar që të futen në sistemin e kërkimit të INTERPOL-it.
Në dokumentet e siguruara nga Radio Evropa e Lirë theksohet se Rusia i konsideron zyrtarët policorë në fjalë si të dyshuar për veprat “arrestim i paligjshëm” dhe “kidnapim”.
Rusia, sipas REL, ka pretenduar se këta policë ishin të përfshirë në “arrestimin dhe keqtrajtimin” e shtetasit rus, Mikhail Krasnoshchenkovit në vitin 2019, i cili ishte i punësuar atëkohë në Misionin e Kombeve të Bashkuara në Kosovë – UNMIK.
Ai ishte udhëheqës i ekipit në Zyrën e UNMIK-ut në Zubin Potok – komunë kjo e banuar me shumicë serbe në veri të Kosovës.
Në listën e shtetit rus, ashtu si edhe në dokumentet e INTERPOL-it, policët përshkruhen si shtetas të Serbisë, meqë Rusia nuk e njeh shtetësinë e Kosovës.
Mediat kishin raportuar se në mesin e personave të kërkuar nga Rusia janë dy policë të njësive elitare të Policisë së Kosovës: Besart Ahmeti dhe Alban Jetullahu.
Por, Radio Evropa e Lirë duke cituar listën e personave të kërkuar ndërkombëtarisht, të përpiluar nga Ministria e Brendshme e Rusisë, ka raportuar se në mesin e personave të kërkuar nga Rusia figuron edhe emri i Faruk Gashit, po ashtu, pjesëtar i Policisë së Kosovës.
Mikhail Krasnoshchenkov asokohe ishte ndaluar nga Policia e Kosovës, në rrugën nga Zubin Potoku në drejtim të Mitrovicës së Veriut, gjatë një aksioni kundër kontrabandës dhe krimit të organizuar në Veriun e Kosovës.
Aksioni ishte zhvillua më 28 maj të vitit 2019.
Krasnoshchenkov më pas ishte lirua, ngase kishte imunitet diplomatik si pjesëtar i UNMIK-ut, por Qeveria e Kosovës e kishte shpallur person të padëshiruar, duke e dëbuar nga Kosova.
Krasnoshchenkov, asokohe kishte marr trajtim mjekësor në Beograd, pas pretendimeve se ishte maltretuar nga pjesëtarë të Policisë së Kosovës.
Në kohën e këtij incidenti, UNMIK-u kishte kërkuar lirimin e tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
