Për herë të parë, Mbretëresha Elizabeth II do të emërojë kryeministrin jashtë Pallatit Buckingham
Mbretëresha e Britanisë Elizabeth II do të mirëpresë kryeministrin e ri për herë të parë në mbretërimin e saj të gjatë në rezidencën Balmoral në Skoci.
Lajmi u bë i ditur nga transmetuesi britanik “Sky News”.
Mbretëresha do të takohet me kreun e ri të qeverisë më 6 shtator, një ditë pas shpalljes së emrit të tij.
Historikisht, ajo ka emëruar kryeministra të mëparshëm në Pallatin e Buckingham-it ose Kështjellën Windsor.
Megjithatë, monarkja 96-vjeçare është këshilluar të qëndrojë në rezidencën e saj Balmoral në Aberdeenshire, ku ajo kalon pushimet e saj verore.
Nga atje ajo do të emërojë Rishi Sunak ose Liz Truss si kryeministër më 6 shtator, duke thyer traditën e gjatë mbretërore.
Mbretëresha ka vuajtur nga problemet e lëvizjes që nga vjeshta e kaluar dhe tani përdor rregullisht një bastun.
Ajo u detyrua të ndërpresë disa angazhime zyrtare këtë vit, dhe në mënyrë të dukshme humbi shumicën e festimeve të përvjetorit të saj, duke bërë vetëm një paraqitje të shkurtër në ballkonin e pallatit.
Sipas sondazheve të fundit, Liz Truss do të fitojë garën për postin e kreut të Partisë Konservatore dhe kryeministres nga ish-ministri i financave Rishi Sunak.
Ajo së fundmi tha se nëse zgjidhet në postin e kreut të qeverisë britanike, do të ishte e gatshme të përdorte armë bërthamore, edhe nëse kjo do të thotë “shkatërrim global”.
Ajo gjithashtu vuri në dyshim nëse presidenti francez Emmanuel Macron është mik i Britanisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com