Pentagoni mund të inspektojë përdorimin e armëve amerikane në Ukrainë

Pentagon-i po shqyrton mundësinë e dërgimit të inspektorëve në Ukrainë për të marrë drejtpërdrejt informacione në lidhje me përdorimin e armëve të ofruara nga Shtetet e Bashkuara në Ukrainë.

Këtë e deklaroi Jed Royal, zëvendëskryetar i Agjencisë së Pentagon-it për Bashkëpunim Mbrojtës të SHBA-ve, sipas Zërit të Amerikës.

“Me kalimin e kohës, ne do të dëshironim të ishim në gjendje të rrisim ndërgjegjësimin tonë dhe të rrisim praninë tonë në terren”, theksoi Royal gjatë një konference për shtyp.

Zyrtari amerikan shtoi se një mision i tillë i ekspertëve, i cili do të ishte në vend, do të mund të kontrollonte fizikisht armët dhe të kontrollonte numrat serialë.

Ndërkohë, Pentagoni mbështetet në informacionet nga pala ukrainase në lidhje me përdorimin e armëve të ofruara nga Shtetet e Bashkuara për Ukrainën.

Royal vuri në dukje se koordinimi me palën ukrainase po vazhdon në mënyrë efektive.

“Komunikimi me ukrainasit është jashtëzakonisht aktiv dhe garancitë që marrim nga ta për mënyrën se si ata i operojnë këto sisteme dhe i mbrojnë ato, do të thoja, janë të kënaqshme”, nënvizoi ai.

Ligjvënësit amerikanë kanë bërë thirrje për përgjegjësi më të madhe në përdorimin e ndihmës mbrojtëse.

Në maj, republikanët John F. Kennedy dhe Rand Paul propozuan krijimin e një inspektoriati për të mbikëqyrur përdorimin e ndihmës mbrojtëse nga Ukraina.

Në qershor, senatorja demokrate Elizabeth Warren i bëri thirrje qeverisë të jetë më e përgjegjshme.

Në një koment për Politico, ajo vuri në dukje se populli amerikan pret “mbikëqyrje të fortë” nga Kongresi dhe “përgjegjësi të plotë të Departamentit të Mbrojtjes” në lidhje me miliardat e “ndihmave ekonomike dhe ushtarake për popullin ukrainas për të fituar luftën brutale të Putin-it”.

Këtë javë, Departamenti Amerikan i Mbrojtjes njoftoi 820 milionë dollarë ndihmë shtesë për Ukrainën.

Paketa e re përfshin deri në 50 milionë dollarë ndihmë të posaçme për kompetencat presidenciale, si dhe 770 milionë dollarë përmes Iniciativës së Ndihmës për Sigurinë e Ukrainës (USAI).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.