Kush qëndron pas sulmit kibernetik ndaj stacioneve iraniane të karburantit?

Një grup hakerash, Predatory Sparrow, mori përgjegjësinë javën e kaluar për sulmin kibernetik që kishte shënjestruar sistemin e shpërndarjes së karburantit të Iranit, duke ndërprerë 70 për qind të të gjithë rrjetit.

Incidenti i pengoi iranianët të paguanin për tërheqjet e tyre të subvencionuara të benzinës me kartat e tyre bankare.

Në tetor 2021, grupi i hakerëve mori përgjegjësinë për një sulm të ngjashëm, gjatë të cilit sistemi kombëtar i pagesave të stacioneve iraniane të karburantit doli gjithashtu jashtë linje.

Gjatë sulmit, ai dyshohet se ka hakuar edhe tabelat digjitale në rrugë, duke i bërë ato të shfaqin një mesazh që pyeste “Khamenei, ku është karburanti ynë?”, duke iu referuar udhëheqësit suprem të vendit.

Por kush qëndron pas grupit Predatory Sparrow?

Duke u paraqitur me emrin e tij persian Gonjeshke Darande, grupi Predatory Sparrow duket se kontrollon saktësisht rreziqet, ndërkohë që ka një ndikim të rëndësishëm.

Në qershor 2022, ka zbuluar se ishte përgjegjës për një zjarr në një fabrikë çeliku në Iran, duke e përshkruar veprimin si një përgjigje ndaj “agresioneve” të Republikës Islamike, të cilat nuk i kishte specifikuar.

Grupi më pas ka pohuar se kompania e synuar, me dy kompani të tjera të shënjestruara në të njëjtin muaj, vazhdoi aktivitetet pavarësisht sanksioneve ndërkombëtare, të cilave iu nënshtrua, duke specifikuar se i kreu sulmet kibernetike “me kujdes, për të mbrojtur njerëzit e pafajshëm”.

Çka mjafton për të sugjeruar se “grupi ose udhëhiqet ose sponsorizohet nga një shtet-komb”, sipas një menaxheri të Check Point Software, një kompani e specializuar në kërkimin kibernetik.

​ Vendi i parë i dyshuar: Izraeli, i cili ka qenë i përfshirë në një luftë në hije kundër Iranit për dekada të tëra, duke përfshirë edhe në nivelin kibernetik.

Shumë ekspertë e lidhin grupin me shtetin hebre, pa u njohur një përkatësi zyrtare. Sidomos pasi sulmet kibernetike, si ai i fabrikës së çelikut në vitin 2022 që shkaktoi dëme fizike, janë të rralla.

Dhe operacioni i fundit i këtij lloji kundër Iranit, në vitin 2010, u konsiderua nga shumë vëzhgues se ishte kryer nga shteti hebre, me mbështetjen e SHBA-ve, të dyja të vendosura kundër marrjes së armëve bërthamore nga Republika Islamike.

Kjo pasi objektivi përfshinte objektet e programit bërthamor iranian në Natanz, të cilat ishin infektuar nga virusi kompjuterik Stuxnet.

Çka do të kishte shkaktuar dëme të konsiderueshme në centrifugat e përdorura për pasurimin e uraniumit, duke ngadalësuar ndjeshëm zhvillimin e aftësive bërthamore iraniane.

Një luftë e fshehur kibernetike

Sulmi kibernetik ndaj stacioneve të karburantit ka ndodhur gjithashtu në mes të luftës Izrael-Hamas,  shkaktuar nga Operacioni Al-Aksa Flood i nisur nga Hamasi më 7 tetor dhe që la gati 1 mijë e 150 të vdekur në Izrael dhe më shumë se 240 pengje.

Në këtë konflikt, SHBA-të janë vendosur si aleatë të palëkundur të Izraelit, ndërsa Irani mbështet lëvizjen islamike.

Në këtë vazhdë, ministri iranian i naftës Javad Owji ka akuzuar Izraelin dhe SHBA-të se kishin orkestruar sulmin.

Ka akuzuar “armikun sionist dhe Amerikën se duan të shkaktojnë probleme për njerëzit, sepse ata kanë pësuar disfata në fronte të tjera”.

Sakaq, Drejtoria Kombëtare Kibernetike e Izraelit (INCD) ka akuzuar hakerët që dyshohet se janë të lidhur me Iranin dhe Hezbollahun se kanë shënjestruar një spital izraelit tre javë më parë, gjatë të cilit të dhënat konfidenciale janë komprometuar.

Diçka kjo që mjafton të mendohet një lidhje me sulmin kibernetik kundër pikave të karburantit në Iran.

Marrë nga “L’Orient-Le Jour”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.