Kupa e Botës 2030 do të nisë në Argjentinë, Paraguaj dhe Uruguaj

Presidenti i Conmebol, organit drejtues të futbollit të Amerikës së Jugut, Alejandro Dominguez njoftoi sot, 4 tetor, se Kupa e Botës FIFA 2030, edicioni që do të shënojë njëqindvjetorin e Kupës së Botës, do të fillojë në Amerikën e Jugut, me tre ndeshje inauguruese që do të luhen në Uruguaj, Argjentinë dhe Paraguaj.

“Ne ëndërruam shumë. Kupa e Botës, njëqindvjetori, 2030 fillon aty ku filloi gjithçka. Uruguai, Argjentina dhe Paraguaj do të presin ndeshjet inauguruese të Kupës së Botës njëqindvjecare”, tha Dominguez.

Sot u mbajt Këshilli i FIFA-s, ku ndër pikat e rendit të ditës ishte edhe tema e vendndodhjes së Kupës së Botës 2030.

Informacioni i komunikuar personalisht nga Dominguez u konfirmua më pas nga llogaria zyrtare në Twitter e AFA (Federata Argjentinase e Futbollit, Kampion Botëror në fuqi). Për momentin kanë ardhur të vetmet konfirmime për ndeshjet hapëse, por nuk është e qartë se çfarë do të ndodhë për pjesën tjetër të turneut.

Në fakt, ndër kandidaturat zyrtare është edhe ajo e Spanjës, Portugalisë dhe Marokut, të cilat mund të jenë pritëse të pjesës së mbetur të eventit.

Fillimisht propozuan edhe Mbretëria e Bashkuar dhe Irlanda, për t’u kthyer më pas te Euro 2028 dhe ndër ofertat e “dështuara” ishin edhe ato të Arabisë Saudite, Greqisë dhe Egjiptit.

Është e besueshme të imagjinohet se sauditët tani do të synojnë fuqishëm edicionin e Kupës së Botës 2034. Në atë kohë, sipas rregulloreve, do të kenë kaluar dy edicione që nga i fundit i luajtur në Azi (Katar 2022) dhe vendi arab do të mund të përfundojë kështu planin e tij në lidhje me ngjarjen më të madhe të futbollit në planet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.