Kritika Xhaçkës dhe vlerësim për Spiropalin, Rama kërkon mobilizim të deputetëve në Parlament

Kryeministri i Shqipërisë dhe njëkohësisht kreu i Partisë Socialiste, Edi Rama, ka kërkuar mobilizim maksimal të deputetëve në sesionin e ri parlamentar, duke i bërë të qartë atyre se nuk duhet të mungojnë në mbledhjet e Komisioneve dhe diskutimet.

Një vlerësim performance e ka bërë edhe për disa ministre, ku siç ka mësuar Albanian Post, kritika i janë bërë kryediplomates shqiptare, Olta Xhaçka, për një performancë të etiketuar si “të dobët” nga kreu i Qeverisë.

Ndërsa, ministrja e shtetit për Marrëdhëniet me Parlamentin, Elisa Spiropali, është vlerësuar më lart se të tjerët për punën e saj.

Ndaj deputetëve që kanë munguar më së shumti në mbledhjet e Komisioneve Parlamentare, Rama ka mbajtur qëndrim të ashpër, pasi kanë bërë edhe që diskutimet të mos zhvillohen e të shtyhen.

Një gjë kjo sipas kryesocialistit, e cila nuk duhet të ndodhë më.

Ndërsa, në takimin e Grupit Parlamentar, ka qenë i pranishëm edhe deputeti Agron Çela, i cili vetëm së fundmi i është bashkuar Partisë Socialiste, pas kundërshtive në pikëpamjet politike që pati me Partinë e Lirisë.

Nga prezenca e deputetëve në terren deri tek amnistia fiskale, Balla sqaron diskutimet brenda PS-së

Kuvendi çel sesionin e katërt, me ndryshime rrënjësore

Kuvendi i Shqipërisë do të çelë zyrtarisht sesionin e katërt parlamentar pasditen e 16 janarit, me një seancë ceremoniale, e cila pritet të fillojë në orën 16:00.

Kryetarja e Kuvendit, Lindita Nikolla, si edhe krerët e grupeve parlamentare, pritet të mbajnë fjalët e rastit, por debati mes palëve, nuk do të mungojë në seancën hapëse, lidhur me situatën politike dhe ekonomike në vend.

Ndryshime rrënjësore do të hasen që në rreshtimet e partive në këtë sesion të katërt, ku mazhoranca e gjen veten me një deputet më shumë, pas kalimit të Agron Çelës nga Partia e Lirisë në Partinë Socialiste, gjatë ditëve të fundit të dhjetorit, me zyrtarizimin e tij për këtë kalim në janar.

Kështu, kampi opozitar, ende i përçarë, do ta gjejë veten jo vetëm me Çelën, si një deputet më pak, por edhe me një tjetër mungesë, pasi Petrit Doda, i zgjedhur nën logon e Partisë Demokratike dhe zëvendësues i ish-kreut të Grupit Parlamentar demokrat, Alfred Rushaj, ka bërë me dije se do të regjistrohet si i pavarur në Parlament.

Kështu do të jenë edhe katër emra të sapo-përjashtuar nga grupi demokrat, me vendim nga kreu i këtij grupacioni, Enkelejd Alibeaj.

Belind Këlliçi, Oerd Bylykbashi, Agron Shehaj dhe Tritan Shehu, nuk janë më pjesë e listës së PD-së në Parlament…zyrtarisht.

Një “hakmarrje” e vetë Alibeajt ka qenë rezultant i këtij vendimi, pasi për këtë të fundit, janë mbledhur firma për shkarkimin si drejtues i demokratëve në Kuvend.

Vendim konkret nuk ka, por nëse konkretizohet projekti për të projektuar Ervin Salianjin si përfaqësuesin e ri zyrtar të deputetëve demokratë në Kuvend, Alibeajt nuk do t’i lihet më vend.

Shumicën brenda kampit blu – përtej të pavendosurve – qartësisht e ka Sali Berisha, i cili së bashku me Alibeajn, është në pritje të vendimit të Gjykata do të japë, mbi kujt i takon vula e PD-së.

Problemi, sa për vulën, është edhe më i thellë e ideologjik, pasi vetë Alibeaj pretendon se pas largimit të ish-kryetarit, Lulzim Basha, është ai vetë kryetar de jure i forcës politike.

Nëse çështja nuk zgjidhet sa më parë, probleme do të ketë edhe në zgjedhjet vendore të 14 majit, ku Komisioni Qendror i Zgjedhjeve, do të ketë detyrim të regjistrojë nën logon e Partisë Demokratike, vetëm strukturën që Gjykata përcakton si legjitime.

A vlen kjo gjithsesi, në një çast historik, kur përçarja në PD, është më e thella e parë ndonjëherë në politikën shqiptare…edhe më e madhe se sa degëzimi i dikurshëm i PS-së, kur Ilir Meta formoi një front të ri, nën logon e Lëvizjes Socialiste për Integrim?

Mbi këta të fundit, rrudhja e votave nuk mjaftoi në zgjedhjet e përgjithshme të 2021-shit, pasi Çela, pikërisht mbi mosmarrëveshje brenda partiake me Partinë e Lirisë (ish-LSI), e preferoi ikjen me PS-në këtë sesion.

Kështu, me një mazhorancë ende të qetë e me pak diskutime rreth mandatit, me një debat të brendshëm, sa të jashtëm, mes demokratëve dhe me një parti të qendrës që po e shteron ekzistencën parlamentare, sesioni i katërt pritet të nisë me ndryshime të mëdha.

Gjuha që do të zotërojë foltoren, do të shihet më shpejt se vonë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.