Kosovë: Transfuzioni i Gjakut, kërkon plazmë nga personat që e kaluan COVID-19

“Kërkesat për mjekim me transfuzion të gjakut, janë shtuar sidomos për raste urgjente”, kështu bëri të ditur për Albanian Post, drejtoresha në Qendrën për Transfuzion të Gjakut, Bukurije Zhubi.

Përveç kësaj kërkese, Zhubi ka treguar se ka edhe rritje të kërkesave për plazmë konvalesente.

“Kemi shtim të kërkesave për plazmë konvalesente për trajtim të pacientëve me COVID-19. Prandaj kërkohet angazhim më i madh i dhuruesve të gjakut që janë shëruar nga Coronavirusi që të vijnë dhe të dhurojnë gjak”.

Të gjitha kërkesat, deri tani Transfuzioni ka arritur që t’i mbuloj, falë dhuruesëve vullnetar.

“Duke ju falenderuar dhuruesve vullnetar të gjakut, kemi arritur që të mbulojmë të gjitha kërkesat urgjente deri tani, por edhe ato për pacientët me COVID-19, prandaj duhet të vazhdohet me dhurim të gjakut, që të sigurojmë sasi të mjaftueshme”, pohon Zhubi.

Ajo bën të ditur, se edhe personat e vaksinuar mund të dhurojnë gjak, madje pak ditë pasi kanë marrë vaksinën.

“Të gjithë ata që janë vaksinuar mund të dhurojnë gjak dy ditë pas vaksinimit, mirëpo vetëm kur janë të vaksinuar me vaksinën Pfizer”.

Sipas Zhubit, “me vaksinat AstraZeneca dhe të tjerat dhurimi i gjakut duhet të shtyhet për katër jave, ndërsa Moderna dhe Pfizer vetëm dy ditë, ky është dallimi”.

Në anën tjetër, në Qendrën Emergjente, drejtori Basri Lenjani, thotë se prioriteti i këtij institucioni vazhdon të jetë sigurimi i dozave të gjakut.

“Ky institucion gjithmonë e ka prioritet sigurimin e dozave të gjakut, asnjëherë nuk ka ndodhur që ndonjë pacient të humb jetën si pasojë e mungesës së ndonjë grupi të gjakut”, thotë ai.

Lenjani shprehet se Klinika Emergjente në bashkëpunim me Transfuzionin, gjithmonë kur ka qenë në kërkim të gjakut, kjo e fundit i ka dalë në ndihmë.

“Ky bashkëpunim është thelluar çdo herë për të mbështetur të sëmurët që kanë nevojë për gjak. Ne pretendojmë që shërbimet emergjente do duhej të jenë prioritet dhe ky bashkëpunim po vazhdon. Kërkesat tona janë të arsyeshme dhe mbulohen me doza gjaku”.

Po ashtu, drejtoresha e transfuzionit për gjak, tregon se gjak mund të dhurojnë edhe personat të cilët e kanë kaluar virusin e nuk kanë më simptoma.

“Dhuruesve të gjakut të cilët e kanë kaluar virusin COVID-19 dhe kanë marrë vaksinimin, përsëri ju lejohet të dhurojnë plazmën konvaleshente, ndërsa ata të cilët nuk e kanë kaluar virusin COVID-19 dhe kanë marrë vaksinën ata mund të dhurojnë vetëm si dhurues i zakonshëm i gjakut, e jo dhurues i plazmës konvaleshente”.

Gatishmëria për të dhuruar gjak, në shërbim të pacientëve, vjen edhe nga stafi mjekësor. Infermierja, Berita Sinani, e ka kaluar COVID-19, dhe shprehet e gatshme për të dhuruar gjak sa herë ti kërkohet.

“Jam e gatshme të kontribuoj, pra të ju ndihmoj qoftë anëtarëve të familjes apo edhe dikujt tjetër. Nëse ka nevojë që plazma ime të shërbej për trajtimin e një të sëmuri, gjithsesi se do ta bëja”, tha ajo për Albanian Post.

Në shtator, në Kosovë, ka filluar grupit punues për hartimin e protokollit për përdorimin e plazmës konvalesente tek pacientët me COVID-19.

Ky lloj trajtimi bëhet duke marrë plazmën e gjakut nga pacientët e shëruar nga Coronavirusi, pasi që gjaku i tyre ka antitrupa që luftojnë virusin.

Transfuzioni i antitrupave krijon atë që njihet si “imuniteti pasiv” te të prekurit me COVID-19.

Bazuar në të dhënat e Transfuzionit, numri i dhuruesve të gjakut në Kosovë është rritur nga viti në vit. Dhuruesit e gjakut janë të moshave të ndryshme dhe grupeve të ndryshme të gjakut.

Ndërkaq, Organizata Botërore e Shëndetësisë ka paralajmëruar për kujdes lidhur me trajtimin me plazmë të gjakut, pasi ka thënë se ky trajtim është i një “cilësie të dobët”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.