Kina ka ofruar 31 milionë dollarë ndihmë për Afganistanin, ku ato do të ndahen edhe për të siguruar doza vaksinash dhe ushqime.
Kjo lëvizje e Pekinit zyrtar vjen si një përpjekje për të mbajtur lidhjet me Qeverinë e re talebane, të sapoformuar.
Sipas kinezëve, establishmenti i Qeverisë së përkohshme talebane është një hap i nevojshëm për të rivendosur rendin në Afganistan.
Zyrtarisht, ai tashmë njihet si Emirati Islamik i Afganistanit.
Nga ana tjetër, SHBA-të janë larg bisedimeve me rebelët afganë.
Për sa kohë kjo qasje amerikane vazhdon, Kinës i lihet hapësira e duhur për të vepruar. Ministri i Jashtëm kinez, Wang Yi, deklaroi të mërkurën se do të ketë ndihmë për afganët.
Kjo do të vijë në bashkëveprim edhe me vendet fqinje, si: Pakistani, Irani, Tajikistani, Uzbekistani dhe Turkmenistani.
Një ndihmë e veçuar do të jetë edhe ajo me 3 milionë doza të vaksinave kundër COVID-19.
Kritika të shtuara ka pasur edhe me tërheqjen e amerikanëve. Sipas Pekinit zyrtar, kjo ka shkaktuar tollovi në Kabul dhe më gjerë.
“Ajo që SHBA-të bënë në dy dekadat e shkuara, janë shembulli konkret i pasojave që vijnë kur do të imponosh një ideologji të caktuar mbi një tjetër”, u tha nga një zëdhënës për shtyp i Ministrisë së Jashtme të Kinës.
Pala talebane, e ka cilësuar Kinën si partnere thelbësore për rindërtimin e një shteti në rënie. Ndërsa përpjekjet e Pekinit për afrim, kanë qenë edhe më të hershme.
Përpara marrjes së kontrollit nga talebanët, Kina ftoi përfaqësuesit e lartë afganë për bisedime në korrik 2021.
Ndihmë ekonomike dhe mbështetje iu ofruan Qeverisë së atëhershme afgane.
Por, përtej përpjekjeve kineze, ata kanë hasur vështirësi në pasjen e qasjes brenda Afganistanit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
