Mickoski: “VLEN” ka konfirmuar legjitimitetin te shqiptarët – me BDI-në s’kemi asnjë pikë të përbashkët

Lideri nacionalist maqedonas i VMRO-DPMNE-së, Hristjan Mickoski, ka thënë se koalicioni i partive opozitare shqiptare “VLEN” e ka “konfirmuar” legjitimitetin te votuesit shqiptarë” – ndonëse kanë humbur në kampin shqiptar nga “Fronti Evropian” – dhe se ata do të jenë partner të koalicionit qeverisës.

“Me rezultatin në zgjedhje vlerësoj se ata e kanë konfirmuar legjitimitetin e tyre dhe vlerësoj se ata do të jenë partner në Qeverinë e ardhshme që do ta udhëheqë koalicioni ‘Maqedonia jote’ dhe unë si mandatar”, tha Mickoski, transmeton “TV21”.

Me “VLEN”-in Mickoski do bashkëpunim, por jo me partinë më të madhe shqiptare – Bashkimin Demokratik për Integrim, që është bartëse e koalicionit “Fronti Evropian”.

“Me BDI-në nuk kemi pikë të përbashkët”, theksoi fituesi i zgjedhjeve parlamentare të 8 majit në Maqedoni të Veriut.

Këtë, ai u përpoq ta arsyetoi edhe duke thënë se koalicioni i BDI-së ka në përbërje komunitete, një pjesë e të cilëve janë edhe në koalicionin e VMRO-DPMNE.

“Në koalicion (Fronti Evropian) kanë parti të tjera. Ata janë pjesë dhe të komuniteteve jo shumicë që janë pjesë edhe të koalicionit tonë. Kemi dy parti që janë përfaqësues të boshnjakëve, vllahët, romët…, shtoi.

“Në tërë këtë mozaik, përfaqësuesi i vërtetë i komunitetit shqiptar është koalicioni VLEN dhe kjo duhet të respektohet”, pretendoi Mickoski, derisa shtoi se votimi prej badenteri do të arrihet dhe pa BDI-në.

Në zgjedhjet e 8 majit fituese absolute në kampin maqedonas është VMRO-DPMNE, e cila ka marrë 58 mandate nga 120 gjithsejtë, ndërsa LSDM-ja vetëm 18.

Nga ana tjetër, te kampi shqiptar me një diferencë prej 30 mijë ka fituar “Fronti Evropian”, me plotë 19 mandate – partia e dytë në nivel republikan me numër mandatesh – derisa koalicioni “VLEN”, të cilin e do Mickoski në qeveri të tij, i ka marrë 13 deputetë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.