KEDS: Mos e shfrytëzoni rrymën për ngrohje përdorni forma alternative

Kompania kosovare për Distribuim me Energji Elektrike në Kosovë (KEDS), ka apeluar te qytetarët që të mos e shfrytëzojnë rrymën elektrike për ngrohje, kjo pasi që për shkak të mbingarkesës në rrjet.

KEDS-i, përmes një postimi në Facebook ku ka shpërndarë një fotografi të një trafo të rrymës elektrike e cila është djegur nga mbingarkesa, rekomandon që qytetarët të kursejnë energjinë dhe aty ku munden të shfrytëzojnë forma alternative të ngrohjes, në mënyrë që të mos ketë raste të tilla edhe më tutje.

“Një nga dëmet e shumta që mbingarkesat në rrjet shkaktojnë kur konsumatorët e shfrytëzojnë energjinë elektrike për ngrohje. Në mënyrë që të mos ballafaqohemi me pamje të tilla dhe me mungesë të energjisë elektrike, është mëse e nevojshme që konsumatorët të kursejnë energjinë dhe aty ku munden të shfrytëzojnë forma alternative të ngrohjes”, ka njoftuar KEDS-i.

Sipas KEDS-it mbingarkesat në rrjet, si pasojë e shfrytëzimit të energjisë elektrike për ngrohje, kanë lënë një pjesë të qendrës së Gjakovës pa rrymë.

“Shfrytëzimi i energjisë elektrike për ngrohje me rënien e temperaturave po shkakton dëme të mëdha në rrjetin elektrik. Kjo pasi mbingarkesat po dëmtojnë jo vetëm kabllot nëntokësore por edhe stabilimentet tjera energjetike”.

Sipas tyre janë duke bërë përpjekje për të sanuar dëmet por për shkak të motit të ligë po e kanë shumë të vështirë rregullimin e rrjetit energjetik.

“KEDS është duke bërë përpjekje maksimale në terren për të sanuar sa më shpejt dëmet mirëpo situata po bëhet edhe më e vështirë me ndryshimin e motit, ku tashmë kanë filluar rigat e shiut në këtë pjesë. KEDS u bën thirrje konsumatorëve që sa më shumë të mundohen ta kursejnë energjinë elektrike dhe pajisjet shtëpiake t’i shfrytëzojnë pas orës 22:00”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.