Kampi “Belvedere” pagëzohet zyrtarisht me emrin “Enver Zymberi”

Qendra e Njësive Speciale të Policisë së Kosovës në Mitrovicë “Belvedere”, prej të mërkurës do të mbajë emrin e zyrtarit policor, Enver Zymberi, i vrarë në më 25 korrik të vitit 2011 nga një sulm i armatosur me snajper në pjesën veriore të territorit të banuar me serbë etnikë.

Pjesëtari i Policisë së Kosovës, Enver Zymberi, ishte vrarë gjatë një aksioni policor nga strukturat paralele serbe, për futjen nën kontroll të pikave doganore 1 dhe 31 – Jarinjë dhe Bërnjak – në veriun e Kosovës. Ish-presidentja e Kosovës, Atifete Jahjaga, ka ndarë titullin “Hero i Kosovës” për policin e rënë në detyrë.

Në ceremoninë e policëve të rënë ku i pranishëm ishte edhe kryeministri i Kosovës, Albin Kurti, të mërkurën është zbuluar memoriali i Enver Zymberit dhe me këtë rast edhe kampi i njësive elitare të Policisë së Kosovës është pagëzuar me emrin e tij, në shenjë mirënjohjeje dhe përkujtimi për kontributin e tij.

“E sot, teksa kujtojmë të gjithë ata, bëhen 12 vjet nga vrasja e Enver Zymerit nga strukturat kriminale. Kampi ku jemi mbledhur këtu, ka qenë dalja e fundit e Enver Zymerit drejt operacionit për shtrirje të sovranitetit dhe ligjshmërisë në dy pikat kufitare me Serbinë”, ka deklaruar kryeministri Kurti.

Ka kaluar më shumë se një dekadë, por ende nuk dihet kush e vrau zyrtarin policor Enver Zymberi, më 25 korrik të vitit 2011. Për këtë vrasje, sipas Misionit të Bashkimit Evropian për Sundimin e Ligjit në Kosovë (EULEX), kanë qenë të dyshuar dhjetë persona, ndërsa autoritetet kosovare kanë premtuar se do të ndriçojnë rastin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.