Italia shpalli të hënën e 4 korrikut gjendjen e jashtëzakonshme për zonat përreth lumit Po, pasi po vuan thatësirën më të keqe në 70 vjet.
Kjo hapësirë përbën afërsisht një të tretën e prodhimit bujqësor të vendit.
Dekreti i qeverisë do t’i lejojë autoritetet të shkurtojnë burokracinë dhe të ndërmarrin veprime menjëherë nëse e mendojnë të nevojshme, si për shembull vendosjen e racionimit të ujit për shtëpitë dhe bizneset.
Po është lumi më i gjatë i Italisë i cili kalon për më shumë se 650 km (400 milje) përmes veriut të pasur të Italisë. Megjithatë, shumë pjesë të rrugës ujore janë tharë dhe fermerët thonë se rrjedha është aq e dobët sa uji i detit po depërton në brendësi të tokës, duke shkatërruar të korrat.
Qeveria tha në një deklaratë se masat emergjente do të mbulonin tokat që kufizoheshin me Po dhe pellgjet ujore të Alpeve lindore.
Më gjerësisht, ajo vendosi gjithashtu një gjendje të jashtëzakonshme në pesë rajone veriore; Emilia, Romagna, Friuli Venezia Giulia, Lombardia, Piemonte dhe Veneto, duke caktuar një fond fillestar prej 36.5 milionë euro (38 milionë dollarë) për t’i ndihmuar ata të trajtojnë mungesën e ujit.
“Gjendja e jashtëzakonshme synon menaxhimin e situatës aktuale me mjete dhe kompetenca të jashtëzakonshme, me lehtësim dhe ndihmë për popullatën e prekur”, tha qeveria.
Gjithashtu shtoi se masa të mëtejshme mund të merren në të ardhmen për t’u marrë me thatësirën, për të cilën autoritetet e ujit thonë se po ndikon gjithnjë e më shumë Italinë qendrore pas një dimri dhe pranvere jashtëzakonisht të thatë të ndjekur nga një fillim vere jashtëzakonisht e nxehtë.
Mediat italiane kanë raportuar se kryeministri Mario Draghi po konsideronte gjithashtu emërimin e një komisioneri për të koordinuar përgjigjen ndaj thatësirës, në një mënyrë të ngjashme me të cilën qeveria krijoi një komisioner për të mbikëqyrur krizën e koronavirusit.
Marrë nga Reuters, përshtatur për Albanian Post
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
