ISIS merr përgjegjësinë për sulmin vdekjeprurës në Izrael

Policia izraelite deklaroi të dielën se persona të armatosur vranë të paktën dy izraelitë dhe plagosën disa të tjerë në Hadera të Izraelit.

Grupi militant ISIS më vonë mori përgjegjësinë për sulmin.

Të shtënat ndodhën ndërsa Sekretari amerikan i Shtetit Antony Blinken mori pjesë në një seri historike takimesh me ministrat e jashtëm të Izraelit, Egjiptit, Marokut, Bahreinit dhe Emirateve të Bashkuara Arabe në jug të Izraelit.

Sipas policisë, sulmi i së dielës filloi rreth orës 21:00 sipas orës lokale, kur dy sulmuesit filluan të qëllonin me armë automatike mbi një grup policësh dhe civilësh.

Oficerët e njësisë speciale të policisë që ishin në një restorant aty pranë u përgjigjën në vendngjarje kur dëgjuan të shtëna armësh dhe vranë dy autorët, tha policia.

Autoritetet vendase zbuluan se dy sulmuesit ishin kushërinj nga qyteti arab Umm el-Fahm në Izrael.

Reagimet

“Sulmi i tmerrshëm terrorist i sonte është një përpjekje e ekstremistëve të dhunshëm për të frikësuar dhe dëmtuar strukturën e jetës këtu”, shkroi në Twitter ministri i Jashtëm izraelit Yair Lapid.

Blinken postoi më vonë në Twitter se SHBA-të dënojnë “sulmin e sotëm terrorist në Hadera, Izrael”.

“Akte të tilla të pakuptimta dhune dhe vrasjesh nuk kanë vend në shoqëri. Ne qëndrojmë me partnerët tanë izraelitë dhe u dërgojmë ngushëllimet tona familjeve të viktimave”, shtoi Blinken.

Katër izraelitë u vranë në qytetin jugor izraelit të Beersheba-s javën e kaluar në sulmin terrorist më vdekjeprurës ndaj civilëve izraelitë që nga viti 2016.

Sipas policisë, sulmuesi, i cili gjithashtu u vra, ishte një mbështetës i dënuar i ISIS.

Agjencia izraelite e sigurisë Shin Bet po heton nëse autorët e të shtënave të së dielës kanë ndonjë lidhje me sulmuesin e Beersheba-s, sipas zyrtarëve izraelitë të sigurisë.

Më 27 mars të vitit 2002, një terrorist palestinez hodhi veten në erë në restorantin e Hotel Park në Netanya në kulmin e Pashkës Seder.

Viktimat ishin 30 civilë izraelitë, shumica e tyre mbi 70 vjeç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.