Gjykata Evropiane për të Drejtat e Njeriut ka nxjerrë një vendim, ku thuhet se Rusia ishte përgjegjëse për vrasjen e ish-oficerit rus të sigurisë Aleksandër Litvinenko në Londër, në vitin 2006.
Litvinenko pasoi një vdekje agonizuese, pasi piu çaj të helmuar me polonium-210, një izotop të rrallë radioaktiv.
Ish-oficeri u sëmur më 1 nëntor të vitit 2006 dhe vdiq disa ditë më vonë.
Litvinenko, 43 vjeç, ishte një kritik i presidentit rus Vladimir Putin, i cili u largua nga Rusia për në Britani gjashtë vjet para se të helmohej.
Një hetim britanik i vitit 2016 arriti në përfundimin se Putin ndoshta miratoi një operacion të inteligjencës ruse për të vrarë Litvinenko-n.
Gjithashtu u zbulua se ish-truproja i KGB-së, Andrei Lugovoy, dhe një tjetër rus, Dmitry Kovtun, kryen vrasjen si pjesë e një operacioni që ndoshta drejtohej nga Shërbimi Federal i Sigurisë i Rusisë (FSB), pasardhësi kryesor i KGB-së të epokës sovjetike.
“Gjykata konstatoi në veçanti se kishte një rast të fortë prima facie që, në helmimin e Litvinenko, Lugovoi dhe Kovtun kishin vepruar si agjentë të shtetit rus”, tha gjykata evropiane.
Rusia zyrtare mohon çdo përfshirje në vdekjen e tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
