FSK e nxjerr të gjallë nga rrënojat foshnjën 2-vjeçare në Turqi

Forca e Sigurisë së Kosovës (FSK) e ka shpëtuar një fëmijë 2-vjeç nga rrënojat në Turqi, derisa ende po mundohen ta shpëtojnë edhe nënën e vajzës së vogël e cila është gjallë nën rrënojat e shkaktuara nga tërmeti.

Këtë e ka bërë të ditur shefi i Komunikimit Strategjik në Ministrinë e Mbrojtjes, gjenerali Sefer Isufi për RTV Dukagjini.

“Nga informatat e fundit që i kemi këta kanë arrit me ekipet tona me detektu disa prej njerëzve në rrënoja, dektektimi është i rëndësishëm, në momentin që detektohet masat për nxjerrje janë më të lehta”, ka thënë ai.

Pas tërmeteve shkatërruese që lanë të vdekur më shumë se 11 mijë e 700 njerëz dhe dhjetëra mijëra të plagosur në Turqi dhe Siri, autoritetet në Kosovë ofruan menjëherë mbështetje për Ankaranë dhe popullin turk.

Ministria e Mbrojtjes e Kosovës, në orët e mbrëmjes së 6 shkurtit, njoftoi se një kontingjent i Forcës së Sigurisë së Kosovës u nis për të ndihmuar autoritetet turke. Në kontingjentin e FSK-së bëjnë pjesë specialistë të kërkim-shpëtimit urban, mjekësi emergjente dhe njësitë e qenve për kërkim-shpëtim.

Ministri i Mbrojtjes, Armend Mehaj, ka bërë të ditur se kontingjenti i Forcës së Sigurisë së Kosovës është duke realizuar me sukses të lartë operacionin e kërkim-shpëtimit në Turqi, pas tërmetit shkatërrues të së hënës.

Institucionet e Kosovës kanë njoftuar se ekipi i mundjes i Kosovës dhe tri familje kosovare kanë qenë në zonën e rrezikut në Turqi, por asnjë shtetas i Kosovës nuk është në mesin e viktimave.

Mbi 11700 viktima nga tërmeti në Turqi dhe Siri – hapet korridori i ndihmës humanitare