Federata Shqiptare e Futbollit (FSHF) dhe Radio Televizioni Publik Shqiptar (RTSH) kanë shpallur formacionin me lojtarët më të mirë të sezonit të kaluar në Abissnet Superiore.
Përveç lojtarëve më të mirë, u shpallën edhe dy fituesit e “Topit të Artë” për meshkuj dhe femra.
“Topi i Artë” për meshkuj shkoi për Dejvi Bregun, ish-lojtarin e Teutës, që aktualisht luan në Turqi me Boluspor-in.
Ndërsa, ai për femra shkoi për Megi Doçin. Kapitenen e Kombëtares së Shqipërisë dhe skuadrës së Vllaznisë.
Formacioni i vitit u përzgjodh nga një juri e analistëve teknik të emisioneve sportive në vend, të cilët kishin marrë përsipër përgjegjësinë për votimin e 11-shit titullar, trajnerin e vitit dhe talentin e sezonit.
Porta ju besua portierit të Tiranës dhe përfaqësueses së Kosovës, Visar Bekaj. Çmimi “Talenti i Sezonit” shkoi për Marsel Ismajlgecin e Tiranës, që njëkohësisht u shpall dhe mbrojtësi i majtë më i mirë.
Erdenis Gurishta i Vllaznisë u shpall mbrojtësi i djathtë më i mirë. Mevlan Adili i Vllaznisë dhe Egzon Belica i Partizanit u shpallën qendrat më të mira të mbrojtjes.
Në mesfushë më të mirët u shpallen: Albano Aleksi i Teutës, Regi Lushkja i Laçit dhe Juljan Shehu, po i Laçit.
Treshja e sulmit përbëhej nga Bregu, Agim Ibrahimi i Kukësit (aktualisht te Dinamo) dhe Jasir Asani i Partizanit (aktualisht te Kisvarda).
Thomas Brdaric i Vllaznisë u shpall trajneri më i mirë i sezonit. Gjyqtari më i mirë u shpall, Eldorjan Hamiti.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
