Fëmija amerikan që shqetëson Pekinin, Dalai Lama e ka njohur atë në mesin e udhëheqësve shpirtërorë të rimishëruar

Dalai Lama, udhëheqësi shpirtëror i budizmit tibetian, ka njohur një djalë tetë-vjeçar mongolo-amerikan si rimishërimin e dhjetë të Khalkha Jetsun Dhampa Rinpoche, udhëheqës shpirtëror në Mongoli dhe autoriteti i tretë mbi budizmin tibetian.

Sipas shtypit indian, njohja u zyrtarizua në një ceremoni të mbajtur në mes të shkurtit në manastirin Gandantegchinlen Khiid në Ulan Bator, e ndjekur më 8 mars nga një ceremoni në Dharamshala, në shtetin indian të Himachal Pradesh, ku jeton Dalai Lama.

Nuk është e qartë nëse emri i tij është Aguidai apo Achiltai, por ai është sigurisht një nga binjakët e familjes Altannar- një nga dinastitë kryesore politike dhe tregtare të Mongolisë.

Fëmija është djali i një profesori të njohur në Universitetin Kombëtar Mongol, nëna e tij, Monkhnasan Narmandakh, është CEO i një prej konglomerateve kryesore industriale, gjyshja e tij është një ish-deputete e parlamentit mongol.

Zgjedhja e një fëmije me pasaportë amerikane mund të tingëllojë si një sfidë për Partinë Komuniste në Pekin.

Mishërimi i nëntë i Khalkha Jetsun Dhampa Rinpoche ishte një tibetian dhe vdiq në Mongoli në 2012.

Në Mongoli lajmi ngjalli gëzim për zgjedhjen e një prej fëmijëve të saj, por frikë për reagimin e Kinës.

Në fakt, Pekini pretendon të drejtën për të emëruar drejtpërdrejt udhëheqësit e budizmit tibetian.

Në vitin 1995, një djalë 6-vjeçar u zgjodh si Panchen Lama i ri, figura e dytë më e rëndësishme në besim.

Tre ditë më vonë ai u arrestua nga autoritetet kineze dhe u zëvendësua me një kandidat tjetër.

Në vitin 2016, Mongolia mori ankesa të forta nga Pekini për vizitën e Dalai Lamës në të cilën ai paralajmëroi mishërimin e ri të Jetsun Dhampa.

Çështja tibetiane është pjesë e dinamikës historike të konfliktit midis Indisë dhe Kinës.

Dalai Lama XIV (Tenzin Gyatso), i lindur në 1935, mbërriti në mërgim në Dharamsala në vitin 1959, falë mbështetjes së kryeministrit të atëhershëm të Indisë, Jawaharlal Nehru, me një ndjekës prej 120 mijë tibetianë, pas shtypjes kineze të kryengritjes e lëvizjes së rezistencës së Tibetit.

Në vitin 2019, duke folur në 60-vjetorin e mbërritjes së tij si i mërguar nga Tibeti, 87-vjeçari Dalai Lama tha se pasardhësi i tij mund të gjendet në Indi.

Udhëheqësi shpirtëror i budizmit tibetian spekuloi gjithashtu se pas vdekjes së tij mund të kishte dy Dalai Lama, njëri prej të cilëve u zgjodh nga Kina.

Më në fund, sipas udhëzimeve shpirtërore budiste, mund të mos ketë një të tillë.

Megjithatë, nëse ka një Dalai Lama të ri, ai nuk do të ketë një rol politik, saktësoi Dalai Lama, fitues i çmimit Nobel për Paqe, i cili që nga viti 2001 nuk ka më përgjegjësi politike.

Marrë nga Corriere della Sera, përshtatur për Albanian Post 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.