Eshtrat e Julian Sands gjenden në një nga malet e Kalifornisë

Lajmi për të cilin të gjithë kishin frikë është konfirmuar.

Julian Sands, aktori që u zhduk pa gjurmë më 13 janar, pranë malit San Antonio, u gjet i pajetë.

Eshtrat e gjetura në malet e Kalifornisë janë ato të aktorit britanik.

Më 13 janar ai shkoi për shëtitje në zonën e quajtur Baldy Bowl, rreth 70 kilometra në lindje të Los Angeles-it.

Lajmi u raportua në media tre ditë pasi eshtrat u gjetën nga disa alpinistë.

“Procesi i identifikimit të trupit të gjetur në malin Baldy më 24 qershor u përfundua dhe ai u identifikua si 65-vjeçari Julian Sands”, ka thënë Departamenti i Sherifit të Qarkut San Bernardino.

“Mënyra e vdekjes është ende duke u hetuar, në pritje të rezultateve të mëtejshme të testit”, ka vijuar deklarata.

Sands, i cili mbushi 65 vjeç më 4 janar, ishte zhdukur që nga 13 janari dhe që nga ajo kohë ka pasur përpjekje të ndryshme për ta gjetur, shpeshherë të penguara nga moti i keq.

Në të njëjtat ditë në fillim të vitit, një tjetër alpinist u gjet i vdekur, i cili u zhduk në të njëjtën ditë me Sands në zonë.

Përsëri, bora dhe dukshmëria e kufizuar kishin penguar prej kohësh kërkimet.

Edhe pse ishte një alpinist ekspert, mund të ndodhë që kushtet malore të asaj kohe, veçanërisht me borë dhe me rrezik orteku, i vunë në provë aftësitë e tij, si dhe ngadalësuan operacionet e para të kërkimit.

“Ai gjithmonë rrezikonte. Gjithmonë ka qenë kështu: ekstrem, aventuresk dhe asnjëherë i prirur ndaj kufijve. Kur ishte në majë të një mali në një mëngjes të ftohtë, ishte më i lumturi nga të gjithë”, ka treguar vëllai Nick.

Shpresat për ta gjetur atë, në çdo rast, nuk janë zbehur kurrë dhe vetëm javët e fundit një ekip i ri studiuesish ishte dërguar në zonë për të provuar shansin e fundit.

Sands filloi karrierën e tij në film në vitet 1980.

Në vitin 1985 i erdhi një rol i rëndësishëm, ai që e bëri të famshëm pranë të resë Helena Bonham Carter, në filmin e James Ivory që fitoi tre çmime Oscar, “A Room with a View”.

Pas suksesit të filmit, Sands u zhvendos në Hollywood ku vazhdoi karrierën e tij duke luajtur role në filma të zhanreve të ndryshme, por mbi të gjitha në fushën e horrorit si Warlock (1989).

Në pjesën e dytë të karrierës së tij ai mori pjesë në filma të suksesshëm edhe pse në pjesë të vogla.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.