Eksperti amerikan: BE-ja të mos mbështetet në atë që thotë Vuçiç’i – ai është i pasinqertë  

Për njohësin e dinamikave politike në Ballkanin Perëndimor, Alon Ben Meir, tashmë është e qartë se presidenti i Serbisë, Aleksandër Vuçiç, asnjëherë nuk ka pasur për qëllim të përmbushë detyrimet e tij të dala nga marrëveshja e Brukselit dhe aneksi i Ohrit, të dakordësuara fillimisht më 27 shkurt e më pastaj më 18 mars.

Sipas tij fakti që Vuçiç dëshiron që fillimisht Asociacioni i Komunave me Shumicë Serbe të formohet para se të fillojë t’i zbatojë detyrimet e tij të dala nga pikat e tjera të marrëveshjes konfirmon mosgatishmërinë e tij për të normalizuar marrëdhëniet me Kosovën.

“Fakti që në radhë të parë refuzoi të nënshkruante marrëveshjen flet shumë për pa sinqeritetin e tij. BE-ja nuk duhet të mbështetet në atë që thotë Vuçiç’i, por i njëjti duhet të gjykohet vetëm për atë që bën”, ka shkruar Ben Meir në rrjetin e tij social në Twitter.

The EU should not bank on what #Vucic says and he must be judged only on what he does. The fact that Vucic wants the Association to be carried out first before he plays his part just confirms his unwillingness to normalize relations with #Kosovo.

— AlonBenMeir (@AlonBenMeir) May 5, 2023

Një ditë më parë profesori amerikan kishte konsideruar se vota abstenuese e Greqisë në Këshillin e Evropës është hapi i parë drejt njohjes së pavarësisë së Kosovës nga shteti helen.

Prandaj i njëjti ka deklaruar se kryeministri i Kosovës, Albin Kurti, duhet të bëjë gjithçka që mundet për të bashkëpunuar në çdo nivel me Athinën zyrtare si dhe me katër shtetet e tjera anëtare të BE-së që ende nuk e kanë njohur Kosovën.

Në takimin e radhës së nivelit të lartë në kuadër të dialogut Kosovë-Serbi, Albin Kurti dhe Aleksandër Vuçiç, miratuan deklaratën për Personat e Pagjetur dhe u njoftuan me draft-statutin e parë për Asociacionin e Komunave me Shumicë serbe, e cila u prezantua nga Ekipi Menaxhues për hartimin e draft-statutit të këtij mekanizmi i udhëhequr nga deputetja serbe, Danijela Vujiçiç.

Pas takimi kryeministri i Kosovës, Albin Kurti, deklaroi se drafti i statutit i prezantuar të martën në Bruksel nga ekipi në fjalë është i papranueshëm, meqë është në kundërshtim me Kushtetutën e Kosovës pasi prezanton qartësisht një dëshirë për Republika Srpska në Kosovë.

Mu për këtë arsye i pari i qeverisë ka thënë se Ekipi Menaxhues është dekomisionuar, pas propozimit të draftstatutit.

Prandaj, një ditë më pas, saktësisht më 3 maj ministri i Administrimit të Pushtetit Lokal, Elbert Krasniqi, njoftoi se ka liruar nga detyra anëtarët e Ekipit Menaxhues, të thirrur për hartimin e draft-statutit të Asociacionit.

Krasniqi tha, se vendimi i tij bazohet në Marrëveshjet e Brukselit për normalizimin e marrëdhënieve midis Kosovës dhe Serbisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.