Dy palestinezë u vranë nga forcat izraelite në Bregun Perëndimor të pushtuar

Forcat izraelite kanë vrarë dy palestinezë në Bregun Perëndimor të pushtuar, tha ministria palestineze e Shëndetësisë, një ditë pasi Izraeli goditi Rripin e Gazës me raketa që vranë 15 njerëz në sulme të veçanta gjatë disa orësh.

Ministria e Shëndetësisë i identifikoi burrat e vrarë si Ahmad Jamal Assaf, 19 vjeç dhe Warani Walid Qatanat, 24 vjeç, të cilët u qëlluan nga ushtarët izraelitë në qytetin Qabatiya, në jug të Jeninit, njoftoi të mërkurën agjencia palestineze e lajmeve “WAFA”.

Dëshmitarët raportuan se një forcë e madhe ushtarësh izraelitë “bastisën qytetin dhe hynë në disa shtëpi në lagjen perëndimore, i kontrolluan dhe i plaçkitën”, raportoi WAFA.

“Gjatë sulmit, ushtarët hapën zjarr ndaj një makine duke vrarë dy dhe duke plagosur një të tretë”, tha agjencia e lajmeve.

Përdoruesit e mediave sociale në qytet raportuan gjithashtu se forcat izraelite po bastisnin shtëpitë dhe po ndalonin makinat në rrugë.

Në një deklaratë, ushtria izraelite pretendoi se i ndjeri kishte qëlluar mbi ushtarët nga një automjet dhe u vra nga zjarri i kundërt. Një pushkë M-16 dhe një pistoletë u gjetën në vendngjarje, tha ajo.

Dy palestinezë u vranë të martën në një sulm ajror izraelit në një makinë në Rripin jugor të Gazës, sipas mjekëve të ambulancës lokale dhe Ministrisë palestineze të Shëndetësisë.

Më herët gjatë ditës, 40 avionë ushtarakë izraelitë, përfshirë dronë, kryen një seri sulmesh me raketa herët në mëngjes në Gaza, duke vrarë të paktën 13 persona, duke përfshirë tre anëtarë të lëvizjes së Xhihadit Islamik Palestinez, si dhe gratë e tyre, disa fëmijë dhe civilë të tjerë.

Rreth 20 persona u plagosën gjithashtu, disa në gjendje kritike, në sulmet ajrore izraelite që lanë flakë ndërtesat e banimit në qytetin qendror të Gazës dhe të tjerët i shndërruan në rrënoja.

Të paktën 123 palestinezë janë vrarë nga forcat izraelite deri më tani këtë vit, sipas shifrave palestineze. Nëntëmbëdhjetë izraelitë janë vrarë gjithashtu në sulme të veçanta gjatë së njëjtës periudhë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.