“Dhunim të demokracisë” e quan BSPK-ja presionin e Qeverisë për të ndalur grevën

Bashkimi i Sindikatave të Pavarura të Kosovës (BSPK) ka bërë të ditur se Qeveria është duke ushtruar presion ndaj grevistëve që të ndalin grevën.

Përmes një njoftimi nga BSPK-ja është thënë se ekzekutivi nuk është duke bërë përpjekje ta gjej rrugën e duhur.

“Duam të njoftojmë opinionin e gjerë se Partneri ynë Social – Qeveria është duke u munduar të gjejë rrugë jo të mira, kryesisht të presionit joparimor dhe vetëm e vetëm për të bindur grevistët të ndalin Grevën e Përgjithshme”, thuhet në njoftim.

Ndërkaq porositjen e Qeverisë për ndalje të grevës e ka quajtur “dhunim të demokracisë”.

“Bashkimi i Sindikatave të Pavarura të Kosovës njofton opinionin se BSPK-ja do të bënte shkelje të ligjit për greva e mbi të gjitha shkelje të rëndë të parimeve dhe normave sindikale po që se do të ndalte grevën pa u ulur në karrigen e tavolinës së dialogut social dhe pa arritjen e marrëveshjes”, thuhet në njoftim.

Edhe, kreu i Sindikatës së Bashkuar të Arsimit, Shkencës dhe Kulturës, Rrahman Jasharaj, ka bërë të ditur se nuk ka parë as dëshirë e as vullnet nga Qeveria që të bisedojë me gresvistët.

“Ne nuk po shkelim të drejta të askujt por nuk është mirë të tentohet në opinion se po shkelen të drejtat e dikujt. Grevën e kemi përdorur pas 9 muajve, qeveria s’e ka bërë asnjë angazhim por vetëm me fyerje”, kishte deklaruar Jasharaj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.