Zëvendëskryeministri për Integrime Evropiane dhe Dialog, Besnik Bislimi, ka pritur në takim zëvendëskryeministrin për Çështje Evropiane të Maqedonisë së Veriut, Bojan Marichikj.
“E ardhmja e Republikës së Kosovës dhe Maqedonisë së Veriut, përket në Bashkimin Evropian. Vendet tona po bëjnë hapa dhe përpjekje për të avancuar rrugëtimin e tyre drejt BE-së”, thuhet në njoftimin e zyrës së Kryeministrit.
Ndërkaq, aty thuhet se Bislimi e Marichikj kanë diskutuar mbi forcimin e bashkëpunimit përmes dhe mbledhjeve ndërqeveritare që mund të mbahen në të ardhmen.
“Në takim u shprehën dhe përgëzimet për Kosovën në përmbylljen e procesit të liberalizimit të vizave, si hap i rëndësishëm në rrugëtimin evropian të vendit”.
Po ashtu, rritja e efikasitetit sa i përket bashkëpunimit ndërkufitar ishte dhe një prej çështjeve me theks të veçantë të trajtuara gjatë takimit të Bislimit me homologun e tij maqedonas.
Ndryshe, në shtator të vitit 2021 qeveria e Kosovës dhe e Maqedonisë së Veriut kishin mbajtur mbledhjen e përbashkët, ku kishin nënshkruar 11 marrëveshje.
Ndër 11 marrëveshjet e nënshkruara, ishte edhe marrëveshja e studimit të fizibilitetit për rrugën Prizren-Tetovë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
