BE-ja e konsideron lirimin e policëve si hap de-eskalimi, “tani të mbahen zgjedhjet e reja e të formohet Asociacioni”

Komisioneri i Bashkimit Evropian për Zgjerim dhe Fqinjësi, Oliver Varhelyi, nëpërmjet një cicërime në llogarinë e tij në “Twitter”, ka përshëndetur lirimin e tre policëve kosovarë të kidnapuar nga Serbia më 14 qershor dhe njëkohësisht, duke e konsideruar si një veprim drejt de-eskalimit të situatës së tensionuar në veri të Kosovës.

“Mirëpres faktin që autoritetet e Serbisë kanë liruar tre policët që i kishin arrestuar më parë. De-eskalimi duhet të vazhdojë”, ka thënë Varheliy, ndërsa shtoi se tash i takon Kosovës të ndërmarrë hapat për de-eskalim, duke filluar nga zgjedhjet e reja në veri e deri te themelimi i Asociacionit të Komunave me Shumicë Serbe.

“Zgjedhjet e reja komunale duhet të organizohen pa vonesa dhe marrëveshjet e arritura në dialog duhet të implementohen menjëherë duke themeluar Asociacionin e Komunave me Shumicë Serbe”, ka shkruar diplomati hungarez në llogarinë e tij.

Edhe kryeministri i Hungarisë, Viktor Orban, nëpërmjet një cicërime në llogarinë e tij në “Twitter”, ka përshëndetur lirimin e tre policëve kosovarë të rrëmbyer nga strukturat serbe të sigurisë më 14 qershor, ndërsa ka vlerësuar presidentin e Serbisë, Aleksandër Vuçiç, për siç tha, hapin e marrë në “një periudhë sfidash serioze”.

Orban, gjatë një konference të përbashkët me presidentin Vuçiç më 20 qershor në Suboticë, nën pretekstin se “armiqtë e Serbisë janë të etur për të dëmtuar Serbinë”, kishte lutur presidentin serb që të dëgjojë rekomandimin e Budapestit dhe t’i kthejë policët e rrëmbyer të Kosovës në vendin e tyre.

“Presidenti i Serbisë, Aleksandër Vuçiç, sapo më njoftoi se në përputhje me kërkesën e bërë në takimin tonë javën e kaluar, autoritetet serbe së shpejti do t’i lirojnë nga paraburgimi tre policët e Kosovës të arrestuar më parë. E vlerësojmë shumë hapin e presidentit Vuçiç, të cilin e bëri në një periudhë sfidash serioze”, shkroi Orban.

Marrëdhëniet mes dy liderëve populistë e autoritarë janë betonizuar në marrëdhënie të ngrohta që karakterizohen me takime të shpeshta mes tyre, ndërsa qëllimi kryesor i Orbanit thuhet të jetë minimi i unitetit të Bashkimit Evropian dhe të mbrojë aktorët kryesorë pro-Rusisë në rajon.

Ndryshe, tre policët kufitarë të Kosovës – Rifat Zeka, Beqir Sefa dhe Mustafë Shemi – të rrëmbyer nga strukturat e sigurisë së Serbisë më 14 qershor thellë brenda territorit të Kosovës në pjesën veriore, janë liruar për t’u mbrojtur në liri, njoftoi të hënën Gjykata e Lartë në Kralevë.

Ndonëse aktakuza kundër tre policëve kosovarë është konfirmuar nga Prokuroria e Lartë Publike në Kralevë – ata ngarkohen me veprën penale: prodhim, posedim, mbajtje dhe trafikim të paligjshëm të armëve dhe lëndëve plasëse – të njëjtit do të mbrohen në liri, pra është marrë vendimi t’u ndërpritet paraburgimi.

Rrëmbimi i tre policëve kosovarë në vendin e quajtur Tresave/Bare nga autoritetet serbe të sigurisë, kishte shtuar shtresa të reja në një atmosferë tashmë të njohur, por me rrezikun e rrëshqitjes drejt skajeve të përshkallëzimit të mëtejmë dhe ngjitjen drejt esktremeve.

Autoritetet e Kosovës e konsideruan fatin e tre zyrtarëve policorë si kidnapim nga autoritetet e Serbisë brenda territorit të Kosovës dhe agresion ndaj sovranitetit të shtetit, ndërsa autoritetet e Serbisë pretendonin se nuk bëhej fjalë për kidnapim, por për arrestim të policëve kosovarë brenda territorit serb.

Shtetet e QUINT-it (Shtetet e Bashkuara, Gjermania, Mbretëria e Bashkuar, Franca dhe Italia) kishin kërkuar lirimin e menjëhershëm dhe pa kushte të tre policëve të Kosovës. Edhe Bashkimi Evropian po ashtu vazhdimisht kishte kërkuar që të tre policët kosovarë të lirohen.

Kidnapimi i tre policëve kosovarë nga njësitet elitare të Serbisë në vijën kufitare me Kosovën, ndodhi pikërisht në një periudhë tensionesh të larta ndërmjet Kosovës dhe Serbisë, veçanërisht në pjesën veriore të Kosovës të banuar serbë etnikë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.