Balona spiune kineze nuk ka mbledhur informacion, thotë Pentagoni

Balona kineze që përshkoi SHBA-të kontinentale nga Alaska në bregun lindor në shkurt nuk mblodhi asnjë informacion, thotë Pentagoni.

Lajmi u bë i ditur nga multimediali britanik “BBC”.

Shtetet e Bashkuara “ndërmorën hapa për të zbutur” informacionin që mund të mblidhte balona e dyshuar spiune, thanë zyrtarët të enjten.

Mbeturinat e grumbulluara nga balona pasi u rrëzuan po analizohen nga agjencitë e inteligjencës amerikane.

Incidenti shkaktoi një tension mes SHBA-ve dhe Kinës.

Zëdhënësi i Pentagon-it, gjeneral brigade Pat Ryder tha të enjten se autoritetet amerikane ishin “në dijeni se [balona] kishte aftësi për mbledhjen e inteligjencës”.

Por “ka qenë vlerësimi ynë tani që nuk u grumbullua gjatë tranzitit në Shtetet e Bashkuara ose gjatë fluturimit në Shtetet e Bashkuara”.

Ai tha se përpjekjet që autoritetet ndërmorën për të zbutur çdo mbledhje të inteligjencës “kontribuuan” në dështimin e balonës për të mbledhur informacione të ndjeshme.

Gjenerali Ryder nuk konfirmoi një raport të gazetës amerikane “Wall Street Journal” se pajisjet e prodhuara nga Amerika ishin pjesë e balonës, por ai tha se dronët kinezë në të kaluarën kanë përdorur pajisje amerikane.

Balona kaloi një javë në shkurt duke fluturuar mbi Shtetet e Bashkuara dhe Kanada përpara se të rrëzohej nga një avion luftarak në brigjet e Atlantikut, me urdhër të Presidentit Joe Biden.

Sensorët nga balona e dyshuar e spiunazhit kinez u morën më vonë nga oqeani.

Kishte shqetësime se Pekini po përdorte balonën për të mbledhur informacione ndërsa kalonte mbi bazat ushtarake amerikane.

Sekretari i Shtetit Antony Blinken shtyu një udhëtim diplomatik në Pekin për incidentin. Ai udhëtim u riplanifikua dhe u zhvillua në fillim të këtij muaji.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.